Բելառուսական անձնագրով հայը կարողացել է Ադրբեջան այցելել ու հասնել իր ծնողների տուն. Լապշինը տեսանյութ է հրապարակել
Արցախ այցելելու համար Ադրբեջանում դատապարտված, սակայն ավելի ուշ ազատություն ստացած ռուս-իսրայելցի բլոգեր Ալեքսանդր Լապշինն իր Facebook-ի էջում հրապարակել է YouTube-ում տեղադրված տեսանյութ, որի հեղինակը պնդում է, որ լինելով հայ՝ ժամանել է Ադրբեջան և այցելել Գյանջայում (Գանձակ, նախկինում՝ Կիրովաբադ) իր ծնողների տուն:
«Բելառուսական անձնագրով հայ, որը կարողացել է ժամանել Ադրբեջան և հասնել Գյանջայում իր ծնողների տուն: Ադրբեջանն, ինչպես հայտնի է, թույլ չի տալիս երկիր մուտք գործել ազգությամբ հայերին՝ ռասիստական նկատառումներով: Ինչ վերաբերում է նրա ծնողներին և Գյանջային, հայերն այնտեղից փախել են Ղարաբաղյան պատերազմի ժամանակ, և նրանց տները գրավել են ադրբեջանցիները: Չարամիտ Նավթաստանի աչալուրջ անվտանգության աշխատակիցները չեն արձանագրել նրա ազգությամբ հայ լինելը, և նա կարողացել է հիանալի ռեպորտաժ նկարահանել երկրի մասին և վերադառնալ տուն»,- գրել է Լապշինը:
Բլոգերի խոսքով՝ նրա կարճ ֆիլմը ցույց է տալիս հասարակ ադրբեջանցիների «աղքատությունն ու չարությունը, սարսափելի հայաֆոբիան և ամենուրեք առկա լրտեսամոլությունը»:
Հաղորդվում է, որ Ադրբեջանից հետո տղամարդը մեկնել է Հայաստան, այնտեղից՝ Արցախ:
«Մեր մեջ ասած՝ նա բավականին մեծ ռիսկի է դիմել: Քայլել Գյանջայով և տեղացիներին հարցնել հայերի թողած տների մասին՝ դա խելամիտ չէ: Նրան բառի ուղիղ իմաստով կարող էին սպանել դեռ ձերբակալելու համար Պետանվտանգության աշխատակիցներին կանչելուց առաջ: Դե մեր պատվավոր ցանկում, այսինքն՝ Ադրբեջանի «սև ցուցակում» համալրման ենք սպասում»,- գրել է Լապշինը:










