Թրամփը կրկին կեղծիք է անվանել ընտրություններին Ռուսաստանի «միջամտության» մասին պատմությունը

10:22 • 23.07.18

ԱՄՆ նախագահ Դոնալդ Թրամփը, որն անցած շաբաթվա ընթացքում բազմիցս համաձայնել էր 2016 թվականի ԱՄՆ նախագահական ընտրություններին Ռուսաստանին վերագրվող միջամտության մասին ամերիկյան հետախուզական ծառայությունների եզրակացությունների հետ, կրկին կեղծիք է անվանել այս պատմությունը: Այդ մասին նա գրել է Twitter-ի իր էջում:

«Ստացվում է, նախագահ (Բարաք) Օբաման գիտեր Ռուսաստանի (միջամտության) մասին դեռ ընտրություններից առաջ: Ինչո՞ւ նա դրա հետ ոչինչ չարեց: Ինչո՞ւ նա այդ մասին չպատմեց մեր արշավին: Որովհետև, դա մեծ սուտ է, ահա թե ինչու, նաև այն պատճառով, որ նա կարծում էր, թե կհաղթի խարդախ Հիլարին»,- գրել է Թրամփը:

Հիշեցնենք, որ ԱՄՆ նախագահը հուլիսի 16-ին Հելսինկիում ՌԴ նախագահ Վլադիմիր Պուտինի հետ համատեղ մամուլի ասուլիսի ժամանակ հանդես է եկել հայտարարությամբ, որն իրարանցում է առաջացրել ԱՄՆ-ում:

«Իմ ենթակաները՝ Դեն Քոութսը և այլք, հայտարարել են, որ նրանց կարծիքով՝ Ռուսաստանն է միջամտել: Նախագահ Պուտինը նոր ասաց, որ դա Ռուսաստանը չի եղել: Հետևյալը կասեմ՝ ոչ մի պատճառ չեմ տեսնում, որ դա Ռուսաստանը լիներ»,- ասել է նա:

Մեկ օր անց Վաշինգտոնում մամուլի ասուլիսի ժամանակ, սակայն, Թրամփը հրաժարվել է իր խոսքերից՝ պարզաբանելով, որ իր խոսքերից դուրս է մնացել ժխտական մասնիկը:

«Առանցքային նախադասության մեջ ես ասել եմ «լիներ»՝ «չլիներ»-ի փոխարեն»,- ասել է ԱՄՆ նախագահը: Նրա խոսքով՝ նախադասությունը պետք է հետևյալ կերպ հնչեր. «Չեմ տեսնում ոչ մի պատճառ, որ դա Ռուսաստանը չլիներ»: