Ուժի մետ են մտել Ռուսաստանի դեմ ԱՄՆ-ի նոր պատժամիջոցները

10:22 • 27.08.18

Վաշինգտոնի ժամանակով ուղիղ կեսգիշերին ուժի մեջ են մտել անգլիական Սոլսբերի քաղաքում տեղի ունեցած միջադեպի առնչությամբ Ռուսաստանի դեմ ԱՄՆ-ի նոր պատժամիջոցները, հայտնում է «ՌԻԱ Նովոստի»-ն։


ԱՄՆ պետքարտուղարության համապատասխան հրամանագիրն ուրբաթ տեղադրվել է Դաշնային ռեգիստրում և պաշտոնապես հրապարակվել է հանգստյան օրերին։


«Հրամանագիրն ուժի մեջ է մտնում օգոստոսի 27-ից»,- ասված է փաստաթղթում։


Պատժամիջոցների առնչությամբ պետք է դադարեցվի 1961 թվականի օտարերկրյա երկրներին օգնության մասին օրենքով Ռուսաստանին տրամադրվող ցանկացած ամերիկյան օգնություն՝ «բացի շտապ մարդասիրական օգնությունից, սննդամթերքից և այլ գյուղատնտեսական մթերքներից»։


Պետքարտուղարությունը կդադարի արտոնագրեր տրամադրել ռուսական պետական ընկերություններին ամերիկյան զենքի և երկակի նշանակության արտադրանքների տրամադրման համար՝ բացառությամբ տիեզերքում համագործակցության, ինչպես նաև քաղաքացիական ավիացիայի թռիչքների անվտանգության ապահովման համար անհրաժեշտ արտահանվող արտադրանքների։


Բոլոր ամերիկյան հաստատություններին նաև արգելված է տրամադրել «վարկեր, վարկային երաշխիքներ և այլ ֆինանսական աջակցություն»։


Պատժամիջոցների երկրորդ, ավելի խիստ փաթեթը կարող է սահմանվել նոյեմբերին՝ այդ ժամանակ սահմանափակումները կարող են անդրադառնալ ռուսական իրավաբանական անձանց վարկավորմանը, ապրանքների արտահանմանն ու ներկրմանը։