Թրամփն արգելել է Սպիտակ տան վարչակազմին հերոս անվանել կյանքից հեռացած ՄքՔեյնին

11:38 • 27.08.18

Միացյալ Նահանգների նախագահ Դոնալդ Թրամփն արգելել է Սպիտակ տան վարչակազմին պաշտոնական հայտարարություն հրապարակել հանրապետական սենատոր Ջոն ՄքՔեյնի մահվան առնչությամբ, գրում է The Washington Post-ը։

Սպիտակ տան մամուլի խոսնակ Սառա Սանդերսի ու նախագահական աշխատակազմի ղեկավար Ջոն Քելիի պատրաստած փաստաթղթում առաջարկվում էր խոսել սենատորի պատերազմական ձեռքբերումների մասին ու ներկայացնել նրան որպես պատերազմի հերոս։ Մինչդեռ Թրամփը նախընտրել է սահմանափակվել թվիթերյան ցավակցական գրառմամբ։

Հայտնի է, որ Սանդերսը հրաժարվել է որևէ կերպ մեկնաբանել Թրամփի այս դիրքորոշումը։ Լրագրողները ենթադրում են, որ այս ամենի պատճառ կարող է հանդիսանալ ՄքՔեյնի կողմից Թրամփին ուղղված քննադատությունը։ Մասնավորապես՝ սենատորը խիստ քննադատության էր արժանացրել նախագահի առողջապահական ոլորտի բարեփոխումները։

Իր նախընտրական քարոզարշավի ժամանակ Թրամփը ծաղրել էր ՄքՔեյնին, որը Վիետնամի պատերազմի ընթացքում 6 տարի անցկացրել էր գերության մեջ։

«Նա պատերազմի հերոս էր, քանի որ նրան գերի էին վերցրել։ Ես հարգում եմ մարդկանց, որոնք գերի չեն ընկել»,- ասել էր ԱՄՆ-ի՝ այն ժամանակ դեռ ապագա նախագահը։

Հիշեցնենք, որ սենատոր ՄքՔեյնը մահացել է 81 տարեկանում՝ գլխուղեղի ուռուցքից։