Ակնհայտ է, որ քրոջս դեմ հարուցած քրեական գործն առնչվում  է ինձ` որպես ԱԺ պատգամավորի, այս շինծու մեղադրանքն անպատասխան չի մնա. Ս. Ֆարմանյան (տեսանյութեր)

11:25 • 28.08.18

Ազգային ժողովի արտահերթ նիստին վարման կարգով խոսեց ՀՀԿ պատգամավոր Սամվել Ֆարմանյանը, ով անդրադարձավ իր քրոջ՝ Շիրակի նախկին պրոռեկտոր Անահիտ Ֆարմանյանի դեմ հարուցված քրեական գործին:

«Ակնհայտ է, որ հարուցված քրեական գործն առնչվում է ինձ, որպես Ազգային ժողովի պատգամավոր, և իմ քաղաքական գործունեությանը: Սա քաղաքական հետապնդման դասական օրինակ է: Անահիտ Ֆարմանյանի կողմից ներկայացվել է այն, ինչ իրականություն է: Իր փաստաբանների կողմից համապարփակ տեղեկատվություն է ներկայացվել, որը մեկ անգամ ևս ապացուցում է, որ խորհրդային տարիների իրավապահ համակարգի լավագույն ավանդույթներով փնթի, անհիմն, շինծու գործ է թխվել, քրեադատավարական օրենքների կոպտագույն խախտումներով առաջադրվել է մեղադրանք և կալանավորման որոշում կայացվել և հայտարարվել հետախուզում:



Ինչպես խոստացել եմ, ես ապագայում հրապարակայնորեն կանդրադառնամ այս ամենին: Այժմ ուզում եմ արձանագրել, որ նման հետապնդումը գրված և չգրված օրենքների կոպտագույն, ճղճիմ խախտում է, բարոյականության սահմաններից ու մարդկային պատշաճությունից էլ այն կողմ գտնվող արարք, որը չի կարող մնալ անպատասխան»:

Վարման կարգով արձագանքեց ՔՊ անդամ, «Ելք» խմբակցության պատգամավոր Ալեն Սիմոնյանը: «Քրեական գործեր որևիցե մեկի հանդեպ չեն հարուցվում առանց փաստերի, չի հարուցվում որևէ մեկի նախաձեռնությամբ, պետք է մեկընդմիշտ հաշվի առնել դա»,-ասաց նա:

Հիշեցենք, որ Շիրակի պետական համալսարանի նախկին պրոռեկտոր Անահիտ Ֆարմանյանը մեղադրվում է խարդախության մեջ: Դատարանը նրա նկատմամբ խափանման միջոց է ընտրել կալանավորումն ու հայտարարել հետախուզում:

Անահիտ Ֆարմանյանը հայտարարություն էր տարածել և հայտնել, որ իր նկատմամբ առաջադրված մեղադրանքի պատճառը ազգանունն է՝ ԱԺ պատգամավոր Սամվել Ֆարմանյանի քույրը լինելու հանգամանքը։

Անահիտ Ֆարմանյանի պաշտպաններն էլ հավաստիացրել են, որ նա չի խուսափում վարույթն իրականացնող մարմնից, նա գտնվում է ամենամյա արձակուրդում։ «Վարույթն իրականացնող մարմինը Անահիտ Ֆարմանյանի հետ կապի մեջ է եղել փաստաբանի միջոցով։ Անահիտ Ֆարմանյանը մինչև արձակուրդը չի հրավիրվել մասնակցելու դատավարական գործողությունների և չի ունեցել որևէ կարգավիճակ։ Ես անձամբ դեռևս հուլիսի 19-ին տեղեկացրել եմ քննիչին, որ պատրաստ ենք մասնակցել դատավարական գործընթացին»,–հայտարարել է Անահիտ Ֆարմանյանի պաշտպան Նարեկ Ալոյանը։