Նոր կառավարությունն արտաքին քաղաքականության ոլորտում բովանդակային փոփոխության չգնաց, թեև ընդդիմադիր գործունեության ժամանակ կոշտ պահանջներ ուներ. Նարեկ Գալստյան
Հայաստանի իշխանությունները պաշտոնավարման 100 օրերի ընթացքում արտաքին քաղաքականության մեջ ճակատագրական թերություններ թույլ չեն տվել, բայց կա մեկ խնդիր: Այս մասին Tert.am-ի հետ զրույցում ասաց քաղաքագետ Նարեկ Գալստյանը:
«Խնդիրն այն է, որ նոր թիմն արտաքին քաղաքականության ոլորտում բովանդակային փոփոխության չգնաց, թեև ընդդիմադիր գործունեության ժամանակ կոշտ պահանջներ ունեին ԵԱՏՄ-ի, Ռուսաստանի, ՀԱՊԿ-ի հետ կապված: Իշխանության գալով նրանք չգնացին կառուցվածքային փոփոխությունների»,- ասաց Նարեկ Գալստյանը:
Քաղաքագետի խոսքով՝ նոր իշխանությունները պահպանեցին արտաքին կառավարության պահպանման ձևավորված համակարգը: «Մեզ համար կարևոր է արտաքին քաղաքականության ոլորտում որոշակի հետևողականություն, ժառանգականություն ունենալ: Դա չի նշանակում՝ լճանալ, մնալ նույն ուղու վրա, դա նշանակում է պահպանել տրամաբանական կայունություն»,- նշեց Գալստյանը:
Նա ասաց, որ Հայաստանը պետք է հանդես գա պահանջկոտ, արժանապատիվ դիրքերից, պաշտպանի իր իրավունքները, որ արտաքին քաղաքական խաղացողները մեզ դիտարկեն որպես պահանջատեր երկիր:
«Եվրասիական, եվրոպական գործընկերները պիտի հիշեն Փաշինյանի հայտարարություններն այն մասին, որ ստանձնած պարտականությունների կատարման գործում պետք է հետևողական լինեն, պետք է հստակեցնեն դիրքորոշումները Հայաստանի հետ կապված առանցքային հարցերում՝ պատերազմի վերսկսում, արցախյան հակամարտություն և այլն»,- մանրամասնեց Նարեկ Գալստյանը:
Քաղաքագետի դիտարկմամբ՝ Հայաստանը շարունակում է մնալ փոքր ու խոցելի պետություն, որի արտաքին քաղաքական հավակնությունները աշխարհաքաղաքական փոփոխություններից են կախված:
«Մեր գործընկերները Հայաստանին լավ չեն ճանաչում: Չգիտեն, թե ինչ է տեղի ունենալու Հայաստանում սպասվելիք արտահերթ խորհրդարանական ընտրություններից հետո, երբ ձևավորվի նոր իշխանություն: Նրանք չգիտեն, թե այդ ժամանակ ինչ սկզբունքներ ու նպատակներ կհռչակի Հայաստանը: Եթե իմանային, կհասկանային, թե ինչպես շարունակել մեզ հետ հարաբերությունները»,- ասաց Նարեկ Գալստյանը:
Փորձագետն ասաց, որ Հայաստանն իրավունք չունի դուրս գալ ռեալ-պոլիտիկի շրջանակներից, դրա համար Փաշինյանն ու իր թիմը նախկին դիրքորոշմանը չմնացին:
«Ով էլ գա իշխանության, բախվելու է նույն արտաքին քաղաքական խնդիրներին: Դրանք մեզնից չեն կախված: Մեզնից կախված է այդ խնդիրներին դիմակայելու մեթոդների ընտրությունը»,- ասաց Գալստյանը:










