Հրապարակվել են սենատոր Ջոն ՄքՔեյնի հրաժեշտի խոսքերը
Օրերս կյանքից հեռացած ամերիկացի հանրապետական սենատոր Ջոն ՄքՔեյնը մահից առաջ վերջին անգամ դիմել է ԱՄՆ-ի քաղաքացիներին: Քաղաքական գործչի խոսքերը հրապարակել է NBC-ն:
Իր հաղորդագրության մեջ ՄքՔեյնը շնորհակալություն է հայտնել ամերիկացիներին «իրենց ծառայելու պատվի և այն կյանքի համար, որը նա կարողացել է թույլ տալ իրեն բանակում և քաղաքականությունում անցկացրած տարիների շնորհիվ»:
«Ես ջանում էի պատվով ծառայել մեր երկրին: Ես սխալներ եմ գործել, սակայն հույս ունեմ, որ իմ սերն Ամերիկայի հանդեպ կգերազանցի դրանց»,- գրել է սենատորը՝ հավելելով, որ Միացյալ Նահանգներն «ավելի քան պատմության ընթացքում որևէ մեկն օգնել է շատ մարդկանց ազատվել աղքատությունից ու բռնապետությունից»:
«Մենք աշխարհում մեծագույն երկրի քաղաքացիներն ենք, իդեալների ազգը: Մենք օրհնված ենք և օրհնություն ենք բերում մարդկությանը, երբ պաշտպանում ենք մեր իդեալները մեզ մոտ և ամբողջ աշխարհում»,- հայտարարել է ՄքՔեյնը:
Հիշեցնենք, որ 81-ամյա հանրապետական սենատորը կյանքից հեռացել է օգոստոսի 25-ին՝ Արիզոնայի իր տանը: Նրա մոտ ախտորոշվել էր գլխուղեղի քաղցկեղի ագրեսիվ ու հազվագյուտ տեսակ, սակայն օրեր առաջ հայտնի էր դարձել, որ սենատորը որոշում է կայացրել դադարեցնել ուռուցքի բուժումը:










