ԵՄ բնակիչները կողմ են քվեարկել ձմեռային ժամանակի անցումը չեղարկելուն

23:10 • 29.08.18

 

Եվրոպացիների 80 տոկոսից ավելին կողմ են քվեարկել ձմեռային և ամառային ժամանակների անցումը չեղարկելուն: Корреспондент-ի փոխանցմամբ՝ նման արդյունք է ցույց տվել Եվրահանձնաժողովի անցկացրած հարցումը: 

 «Գուցե, շուտով մենք չփոխենք ժամերը տարեկան երկու անգամ: Համենայն դեպս, այդպես են ցանկանում հարցմանը մասնակցած ԵՄ քաղաքացիները: Նրանց մեծամասնությունը կցանկանար, որ մշտապես լիներ ամառային ժամանակը», - գրում է գերմանական աղբյուրը՝ մասնավորեցնելով, որ հարցմանը մասնակցած 4.6 մլն մասնակցից 3 մլն-ը Գերմանիայից է եղել: 

Գարնանը նման հարցում անցկացվել է Գերմանիայում, և այն ժամանակ ժամասլաքի տեղաշարժին դեմ է հանդես եկել գերմանացիների 73 տոկոսը: Որպես փաստարկ նրանք նշել են ինքնազգացողության վատթարացումը՝ պայմանավորված աշխատանքային ու ոչ աշխատանքային գրաֆիկը փոխելու անհրաժեշտությամբ:

Եվրահանձնաժողովի հարցման արդյունքները չեն պարտադրում իրականացնել այն, սակայն հաշվի կառնվեն հարցի քննարկման ժամանակ: Սեպտեմբերի 12-ին Եվրահանձնաժողովի նախագահ Ժան Կլոդ Յունկերը կհայտարարի ամառային և ձմեռային ժամերի անցումը չեղարկելու վերաբերյալ օրենսդրական նախաձեռնության մեկնարկի մասին: