Մյանմայում Reuters-ի լրագրողները դատապարտվել են 7 տարվա ազատազրկման

14:34 • 03.09.18

Մյանմայում դատարանը 7 տարվա ազատազրկման է դատապարտել Reuters լրատվական գործակալության 2 լրագրողի, որոնք մեղավոր են ճանաչվել օրենքը խախտելու ու պետական գաղտնիքները տարածելու համար:

Ինչպես նշում է Reuters-ը, դատավոր Յե Լվինը հայտարարել է, որ 32 և 28-ամյա լրագրողները, խախտելով օրենքը, հասանելիություն են ստացել պետական գաղտնի փաստաթղթերին:

Հայտնի է, որ վճիռը կարող է բողոքարկվել շրջանային, ապա գերագույն դատարաններում:

Լրագրողները հայտարարել են, որ իրենք մեղավոր չեն և որ այդ ամենն իրենց դեմ դավադրության հետևանք է:

Աղբյուրը մանրամասնում է, որ բազմաթիվ իրավապաշտպաններ, ՄԱԿ-ը, Եվրոպական Միությունը, Միացյալ Նահանգները, Կանադան, Ավստրալիան կոչ են արել ազատ արձակել լրագրողներին:

«Այսօր տխուր օր է Մյանմայի, Reuters-ի լրագրողներ Վա Լոնի ու Կյո Սո Օոյի ու համաշխարհային մամուլի համար»,-նշել է Reuters-ի գլխավոր խմբագիր Սթիվեն Ջեյ Ադլերը: