Մոսկվայի մետրոյի «Կուրսկայա» կայարանում ոստիկան է սպանվել
Մոսկովյան մետրոպոլիտենի «Կուրսկայա» կայարանում ոստիկանության աշխատակից է սպանվել: Այս մասին հաղորդում է РИА Новости-ն՝ ներքին գործերի նախարարության Մոսկվայի շրջանային գլխավոր վարչության մամուլի ծառյությանը հղումով:
Միջադեպը տեղի է ունեցել կեսգիշերի սահմաններում: Հաղորդվում է, որ անհայտ անձը հրազենով կրակ է բացել ոստիկանության աշխատակցի ուղղությամբ և վերջինս մահացել է ստացված վնասվածքներից:
«РЕН-ТВ» հեռուստաընկերության տվյալներով՝ կրակ բացած անձը նախկինում ոստիկանի կողմից ձերբակալված մի տղամարդ է, ով անմիջապես փախուստի է դիմել: Կազմվել է ոստիկանական հատուկ խումբ՝ կասկածյալին հայտնաբերելու ու բերման ենթարկելու համար: Հաղորդվում է, որ կասկածյալը 40-45 տարեկան ասիական կամ կովկասյան արտաքինով տղամարդ է:
Դեպքի առթիվ քրեական գործ է հարուցվել: Սպանության վայրում աշխատում են քննիչները:










