Կարծում եմ՝ ճիշտ կլինի երկարաձգել աջ ղեկով մեքենաների ներկրման արգելքի ժամկետը. Ա. Հակոբյան
Կարծում եմ՝ ճիշտ կլինի աջ ղեկով մեքենաների ներկրման արգելքի ժամկետի երկարաձգումը։ Այս մասին այսօր 100 օրվա գործունեությունը ամփոփող ասուլիսին հայտարարեց ՀՀ տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը։
Հիշեցնենք, որ ապրիլի 1-ից արգելվել էր ՀՀ աջ ղեկով մեքենաներ ներկրել։ Այս որոշումը ուժի մեջ է մինչև 2018 թ․-ի հոկտեմբեր։ Իսկ արդեն 2020 թ․-ից ԵԱՏՄ-ով պայմանավորված ընդհանրապես արգելվելու է աջ ղեկով մեքենաների ներկրումը։
«Նորից թույլատրել և հետո նորից արգելելն ավելորդ պրոցես է, որը մենք պետք է անցնենք։ Կարծում եմ՝ ճիշտ կլինի աջ ղեկով մեքենաների ներկման արգելքի ժամկետի երկարաձգումը։ Իրականում, աջ ղեկով մեքենաների քանակի աննախադեպ ավելացումը երթևեկության համար նաև վտանգավորություն է ստեղծում։ Եվ հիմա այսօր նորից հետ քայլ անել, որպեսզի նորից գանք այսօրվա վիճակին, չեմ կարծում, որ դա լուծում է»,- նշեց նախարարը։
Ինչ վերաբերում է մեքենաների ղեկը աջից ձախ տեղափոխմանը, Աշոտ Հակոբյանը հայտնեց, որ կողմ չէ այդ մոտեցմանը։
«Ամբողջ էլեկտրաֆիկացիան խառնվում է իրար։ Անվտանգության նկատառումներով՝ երթևեկության ու մեքենայի տեխնիկական վիճակին այդքան կողմ չեմ»,- ասաց նա։










