Ճապոնիայում «Ջեբի» թայֆունի պատճառով ավելի քան 1,2 մլն մարդ մնացել է առանց էլեկտրականության
Ճապոնիայում ավելի քան 1,2 մլն մարդ մնացել է առանց էլեկտրականության՝ երկրի մի շարք պրեֆեկտուրաներին պատուհասած «Ջեբի» թայֆունի պատճառով։ Այդ մասին հայտնել են Kansai Electric Power և Chubu Electric Power էներգետիկ ընկերությունները, գրում է «ՌԻԱ Նովոստի» գործակալությունը։
Թայֆունից հետո երկրի այս հատվածում արևային ու շոգ եղանակ է հաստատվել, էլեկտրաէներգիայի բացակայությունը թույլ չի տալիս մարդկանց օդորակիչներ միացնել։
Թայֆունի պատճառով հիմնական հարվածները կրել են Օսակա, Գիֆու, Միե և Այտի պրեֆեկտուրաները։
Կիոտո պրեֆեկտուրայում ամառային ճամբարում գտնվող 160 դպրոցական հայտնվել է շրջափակման մեջ, քանի որ թայֆունի հետևանքով ավերվել է այնտեղից դուրս գալու միակ ճանապարհը։
Միայն Օսակա պրեֆեկտուրայում ստեղծված իրավիճակի պատճառով չի աշխատում շուրջ 2000 լուսացույց, ինչն ավելացնում է ճանապարհատրանսպորտային պատահարների աճի վտանգը։
Տուժել է նաև Քանսայի օդանավակայանը, որը ջրհեղեղի պատճառով դադարեցրել է աշխատանքը, հայտնի չէ, թե այն երբ կրկին կգործի։










