Երևանում տեսախցիկներ տեղադրելու ծրագիրը մեզ մոտ չի քննարկվել, բայց որ դրանք չեն կարող դառնալ քաղաքացուն որպես դրամապանակի վերաբերելու միջոց, հստակ է. ՔՊ խոսնակ
Tert.am-ի հետ զրույցում «Քաղաքացիական պայմանագիր» կուսակցության խոսնակ Վահան Կոստանյանն անդրադառնում է Երևանում 2000 նոր տեսախցիկների տեղադրելու հնարավոր ծրագրին ու հարցին, թե արդյոք դա չի հակասում «սկոտչով» տեսախցիկները փակելով իշխանության եկած հեղափոխական թիմի հայտարարություններին:
-Պարո՛ն Կոստանյան, Ոստիկանությունը չի հերքել, ավելին՝ հայտնել է, որ Երևանում 2000-ից ավելի տեսախցիկներ դնելու ծրագիր է ուսումնասիրվում: Հիշեցնեմ, որ սա զուտ ճՈ խնդիր չէ, այլ՝ հեղափոխական սիմվոլիկայի հարց, քանի որ ինչպես հայտնի է՝ Նիկոլ Փաշինյանը և նրա քաղաքական թիմն իշխանության եկան տեսախցիկները «սկոտչով» փակելով: Փաստորեն, ստացվում է՝ մի բան ասվում էր, մեկ բան՝ արվում:
-Վարչապետի կողմից հստակ հայտարարություն եղել է, որ տեսախցիկների նպատակը երբեք չպետք է լինի մարդկանց ֆինանսական տույժերի ենթարկելը, այլ դրանք պետք է լինեն կանխարգելիչ բնույթի: Իսկ նոր տեսախցիկների հայտարարությունը, որ եղել է Ոստիկանության կողմից, դեռևս ՔՊ-ում չի քննարկվել, ու այդ մասով հստակ դիրքորոշում չկա, բայց այն, որ կամերաներն ինքնանպատակ չեն ու չպետք է դառնան քաղաքացուն որպես դրամապանակի վերաբերելու միջոց, հստակ քաղաքական դիրքորոշում է:
-Բայց, մյուս կողմից, շատ բնակիչներ, հատկապես, կենտրոնում դժգոհում են, որ մոտոցիկլետիստները, վարորդները, հեղափոխությունից հետո սկսել են պարզապես՝ լկտի արագություններ զարգացնել հատկապես գիշերային ժամերին, այն դեպքում, երբ քաղաքը լեփ-լեցուն է բնակիչներով ու զբոսաշրջիկներով:
-Կարծում եմ՝ Ճանապարհային ոստիկանությունը դրանով զբաղվում է, իսկ եթե քաղաքացիները հստակ դեպքեր են արձանագրում, շատ ճիշտ կլինի, որ քաղաքացիները համագործակցեն ոստիկանության հետ՝ կոնկրետ դեպքերի առնչությամբ դիմեն ոստիկանություն, որպեսզի այն դեպքերը, որոնք վրիպել են ոստիկանության աչքից, նույնպես համապատասխան հետևանքներ ունենան:
-Այս ընթացքում այլ նմանություններ են արձանագրվում նախկին գործելաոճի հետ: Մասնավորապես, «Իմ քայլը» դաշինքի քաղաքապետի թեկնածու Հայկ Մարությանի «մեր դեմ խաղ չկա», սևերի ու սպիտակների մասով հայտարարությունները: Երբ Նիկոլ Փաշինյանն այդ մասին հարցին, ըստ էության, չպատասխանեց՝ ասելով, որ բնության մեջ շատ ավելի վառ գույներ կան և այլն: Այնուամենայնիվ, այդ արտահայտությունը ձեզ մոտ ներքին կուսակցական քննարկման առարկա չի՞ դարձել:
-Հստակ է, որ քաղաքական դաշտը բազմագույն է, բայց նաև հստակ է, որ քաղաքական դաշտում գոյություն ունեն երևացող և չերևացող ռևանշիստական ուժեր, որոնք դեմ են ժողովրդին, ժողովրդավարական արժեքներին ու իրենց բնույթով հակահեղափոխական են, ինչի մասին էլ Հայկ Մարությանը խոսել է ու դրա մասին պարզաբանում է տվել թե՛ «Ֆեյսբուքում», թե՛«Ազատության» եթերով այն մասին, թե ինչ նկատի ուներ այդ ձևակերպումն արտաբերելով:
-Այսինքն՝ այնպես չի չէ՞, որ բոլոր նրանք, ովքեր չեն ընտրում Մարությանին, սևեր ու հակահեղափոխականներ են, որովհետև ՔՊ-ական շրջանակներից նման կոչեր էլ են լինում, որ ովքեր չեն ընտրի Հայկ Մարությանին, այսպես ձևակերպենք՝ անառակ են:
-Ոչ, ամենևին, քաղաքական դաշտում կան այլ ուժեր, ովքեր կանգնած են եղել հեղափոխության կողքին, ու իրենք էլ իրենց արժեքային համակարգով ժողովրդավարական են, բայց այդ ամենը հաշվի առնելով՝ քաղաքացիներն ընտրություն կատարելիս պետք է հիշեն, որ հեղափոխության առաջին գծում կանգնած են եղել «Իմ քայլը» դաշինքի ներկայացուցիչները՝ թե՛ «Քաղաքացիական պայմանագիր» կուսակցության անդամները, թե՛ այն քաղաքական գործիչները, ովքեր ընդգրկվել են մեր ավագանու ցուցակում:
-Արտաքին քաղաքական դաշտում, էլի կա կարծիք, որ գնում եք Հանրապետականների ճանապարհով, ինչը ֆիքսվեց դեռևս մայիսի 8-ին Նիկոլ Փաշինյանի վարչապետ ընտրվելուց առաջ՝ ԱԺ արտաքին հարաբերությունների հանձնաժողովի նիստում, երբ Հանրապետականներն ասացին, որ «եթե կողմ եք ՀԱՊԿ-ում, ԵԱՏՄ-ում մնալուն, մեզ ինչո՞ւ էիք, ուրեմն քննադատում»:
-Հեղափոխության ժամանակ, ի սկզբանե, քաղաքացիներն, ովքեր կանգնած են եղել հրապարակում, չեն ձևավորել արտաքին քաղաքականությունը փոխելու մանդատ, իսկ ժամանակավոր կառավարությունը, որն իր առաջ ունի կարևորագույն խնդիր՝ անցկացնելու արտահերթ խորհրդարանական ընտրություններ, շարժվում է այն մանդատի շրջանակներում, որը մեզ տվել է ժողովուրդը: Ինչի չի մտնում որևէ արտաքին քաղաքական կոմպոնենտ:
-Նիկոլ Փաշինյանի նշանակումներում կան պաշտոնյաներ, որոնց մասին ավելի ու ավելի հաճախ է գրվում, որ նախկինում ունենալով հստակ արևմտամետ դիրքորոշում՝ ՌԴ իշխանությունների համար հաճելի չեն: Վարչապետի արտաքին հարցերով նախկին խորհրդական Արսեն Խառատյանի անունն էր նշվում, նա հրաժարական տվեց, շատերը կասկածելի են համարում ԱԽ քարտուղար Արմեն Գրիգորյանի հետագա պաշտոնավարումը նույն պատճառով: Վերջինս, ի դեպ, «Նոև կովչեգ» -ին տված հարցազրույցում, ըստ տարբեր գնահատականների, Հռոմից պապից շատ ավելի կաթոլիկ ռուսամետ հայտարարություններ է արել: Փաստորեն, դիրքորոշումների վերախմբագրում կա նաև այս հարցում:
-Այն մարդիկ, ում անունը տալիս եք, զբաղեցրել են, Արսենի դեպքում և պարոն Գրիգորյանի դեպքում՝ զբաղեցնում է, պետական պաշտոն և իրենք շարժվում են ՀՀ արտաքին քաղաքական գծի համաձայն: Ու այդ խոսակցություններն ամենևին չեն համապատասխանում իրականությանը:
-Սահմանադրական փոփոխությունների հետ կապված ՝ հայտարարվեց, որ նախագիծ է մշակվում, ուղարկվելու է ԱԺ: Բայց վերջին շրջանում Հանրապետականները գրեթե ամեն օր ասում են, որ «ով ասաց, որ համաձայն ենք», որ ԱԺ-ն լուծարելը ինքնանպատակ չէ և այլն: Արդյո՞ք կա վերլուծություն, որ Հանրապետականը և ոչ միայն, մյուս ուժերը նույնպես, չգնան ԱԺ-ի ինքնալուծարմանը: Եվ, առհասարակ, այդ փաթեթի մշակումն ի՞նչ փուլում է, մշակվո՞ւմ է, չի՞ մշակվում…
-Նախագծի մշակմամբ զբաղվում է 1-ին փոխվարչապետ Արարատ Միրզոյանի գրասենյակը, և դրա մշակումը բխում է հեղափոխության և հետհեղափոխական շրջանի տրամաբանությունից ու նման նախագիծ բերելն ամբողջությամբ տեղավորվում է այն մանդատի մեջ, որը ժամանակավոր կառավարությանը տվել է ՀՀ քաղաքացին: Եթե կան քաղաքական ուժեր, որոնք ևս մեկ անգամ հրաժարվում են հաշվի նստել ՀՀ քաղաքացու հետ, նման վերաբերմունքը կարող է առաջացնել լրջագույն հակազդեցություն հենց նույն քաղաքացիների կողմից:
-Բայց կա՞ գործողությունների «բ» ծրագիր, թե ինչ է արվելու այդ դեպքում, որովհետև այդ սցենարը շատ հավանական է:
-Դա ոչ թե մեր քաղաքական ուժի գործողությունների ծրագիրն է, այլ, նման գործողություններին հակազդեցությունը կլինի ժողովրդի կողմից, որովհետև նույն «Հանրապետական» ֆրակցիան ու ԱԺ-ն հաստատել են կառավարության ծրագիրը, որտեղ եղել է դրույթ արտահերթ խորհրդարանական ընտրությունների անցկացնելու վերաբերյալ, ինչին ԱԺ մեծամասնությունը կողմ է քվեարկել: Իսկ այդքանից հետո նման քաղաքական դիրքորոշում, եթե կգտնվեն ուժեր, որ կունենան, կփորձեն խաղ խաղալ քաղաքացիների հետ, ապա քաղաքացիների կողմից կարժանանան համապատասխան վերաբերմունքի:
-Ենթադրվում է, որ այս ընթացքում ՔՊ-ին անդամագրվելու բազմաթիվ դիմումներ են եղել: Կուսակցությունից հայտնել էին, որ շատ ընտրովի է լինելու, որպեսզի շարքերում չհայտնվեն պատեհապաշտներ, կարո՞ղ եք ասել՝ քանի դիմում է եղել, քանի մարդ է անդամագրվել:
-Մենք շուրջ 180 դիմում ենք ընդունել, և կա նաև 5100 դիմում, որոնք դեռևս չեն քննարկվել կուսակցության վարչությունում, իսկ կուսակցության վարչությունը մարդկանց կուսակցություն ընդունելու լիազոր մարմինն է: Ու այս պրոցեսին շատ բծախնդրորեն ենք մոտեցել, որպեսզի այն արժեքները, այն ներքին ժողովրդավարությունը, որը դավանել է ու շարունակում է դավանել ՔՊ-ն, վստահ լինենք, որ պահպանվելու է և ընդունվում է կուսակցության նոր անդամների կողմից:










