Հայտնի են դարձել ամենից հաճախ չվերթներն ուշացրած ավիաընկերությունների անունները

10:53 • 11.09.18

Which? սպառողների բրիտանական ասոցիացիայի աշխատակիցները հետազոտել ու պարզել են, թե որ ավիաընկերություններն են ամենից հաճախ ուշացրել չվերթներն ու սպասեցրել ուղևորներին։

Ինչպես գրում է lenta.ru-ն, մասնագետներն ուսումնասիրության են ենթարկել երեք և ավելի ժամ ուշացած չվերթները Մեծ Բրիտանիայից և հակառակ ուղղությամբ՝ սկսած 2017 թվականի հունիսից մինչև 2018-ի հունիս։

Արդյունքում, ամենից շատ ուշացող ավիաընկերությունների ցուցակը գլխավորել է EasyJet-ը, որն ընդհանուր առմամբ մեկ տարվա ընթացքում ուշացրել է 2.618 չվերթ։

Երկրորդ տեղում է հայտնվել իռլանդական Ryanair-ը, որն ունի 1.868 ուշացում։

Եռյակը եզրափակել է British Airways ավիաընկերությունը, որը մեկ տարում չվերթներն ուշացրել է 1.668 անգամ։

Բացի այդ՝ ասոցիացիայի աշխատակիցները կազմել են ցուցակ, որում նշել են այն ավիաընկերությունների անունները, որոնց դեպքում նման ուշացումներն ունեն բավականին բարձր հավանականություն։ Այս ցուցակը Which?-ը բաժանել է երեք մասի․ երկարատև չվերթներ, միջին տևողությամբ և կարճ չվերթներ։ Առաջին խմբում ցուցակը գլխավորել է Norwegian ավիաընկերությունը, երկրորդ տեղում է Thomas Cook Airlines-ը, երրորդը դարձել է Icelandair-ը։