Տ. Մարգարյանը բանավիճելու չէր գնում, հրաժարական տվեց. հիմա ասում եք, որ եկել են առողջ, բանիմաց ուժեր, ինչո՞ւ չեն բանավիճում. Արամ Նավասարդյան
Երևանի ավագանու ընտրություններին մասնակից բոլոր ուժերի ներկայացրած նախընտրական ծրագրերը նույնանման են: Այս մասին Tert.am-ի հետ զրույցում ասաց «GALLUP International association»-ի հայաստանյան ներկայացուցչության տնօրեն Արամ Նավասարդյանը:
«Ես մեծ ակնկալիքներ ունեի այս ընտրությունների հետ կապված: Հույս ունեի, որ սա կլինի ընտրություն, ոչ թե քվեարկություն: Հույս ունեի, որ սա կլինի ծրագրային ընտրություն, մարդիկ կհասկանային ծրագիրը, կվերլուծեին: Բայց սպասումներս ի չիք են դառնում, որովհետև ես տեսնում եմ գրեթե միանման ծրագրեր, ուժերը բարձրաձայնում են նույն խնդիրները, որոնք կրկնում են նախորդ քաղաքային իշխանությունների զարգացման տեսլականը»,- նշեց Արամ Նավասարդյանը:
Վերջինս նշեց, որ տրանսպորտային հարցի լուծման հետ կապված օրինակ բոլոր ուժերը ներկայացնում են այն մոտեցումը, որը ներկայացնում էր ժամանակին Տարոն Մարգարյանը:
«Կարծում եմ, որ ինչ ցանկանում է լսել մեր հասարակությունը, դա էլ բարձրաձայնում են: Մի քաղաքական ուժն ասում է՝ չենք հավատում մյուսին, մյուսը ասում է՝ չենք հավատում մեկ ուրիշին: Մեկը խոստանում է վերելակներ, մյուսն ասում է, որ մեծ վերելակը չես կարող փոքր շախտայում տեղավորել: Սա, իհարկե, դրական է, կարելի է դիտարկել որպես ծրագրերի բախում, բայց բանավեճերի պակաս կա»,- շեշտեց Ա. Նավասարդյանը:
Նրա խոսքով՝ ընտրությունը կատարվելու է անձերի մեջ: «Շատ կուզեի, որ լիներ ծրագրերի, գաղափարների պայքար: Ես չտեսա լիարժեք բանավեճեր, որտեղ ներկայացված կլինեն բոլորը: Երկրորդ, երրորդ դեմքը կարող է մի բան ասել, բայց առաջին դեմքերի մակարդակով բանավեճ չկա, այնինչ հենց առաջին դեմքերն են կառավարելու քաղաքը»,- նշեց Արամ Նավասարդյանը:
Փորձագետն ասաց, որ վերջին 10 տարիների ընթացքում ընդդիմությունը մշտապես քննադատում էր իշխանությանը, որ բանավեճեր չեն անցկացվում: «Ասում էին՝ ինչի՞ Տարոն Մարգարյանը մեզ հետ բանավիճելու չի գալիս: Շատ լավ, չէր գնում, հրաժարական է տվել, հիմա ասում եք, որ եկել են առողջ, բանիմաց ուժեր, ես ուզում եմ տեսնել այդ առողջ ուժերի քննարկումները, որ տեսնեմ՝ բանիմա՞ց են, արդյո՞ք ավելի լավն են, քան Տարոն Մարգարյանը: Ես չէի ուզենա, որ այդպես լիներ, բայց դրսևորվում են...»,- նշեց Ա. Նավասարդյանը:










