Մենք կարծում ենք, որ արդար և արդյունավետ կառավարումն է, որ այսքան ժամանակ պակասել է Երևանին. «Լույս» դաշինքի քարոզարշավը՝ Նոր Նորքում

17:31 • 16.09.18

«Լույս» դաշինքն այսօր առավոտյան քարոզարշավ իրականացրեց Նորք Մարաշում, իսկ այնուհետև դաշինքի անդամները քարոզարշավ իրականացրին Նոր Նորքում:

Շրջելով թաղամասի բակերում դաշինքի անդամները բնակիչներին կոչ արեցին մասնակցել սեպտեմբերի 23-ին տեղի ունենալիք Երևանի ավագանու արտահերթ ընտրություններին:

«Ձեր մասնակցությունն է որոշելու, թե ինչպես է զարգանալու Երևանն առաջիկա հինգ տարիների ընթացքում, ձեր մասնակցությամբ դուք պետք է շարունակեք Հայաստանում տեղի ունեցող փոփոխությունները՝ ամրագրելով դրանք: Այսպիսով, «Լույս» դաշինքը ընտրական ցուցակում համար 8-ն է:

Մենք կոչ ենք անում ձեզ սեպտեմբերի 23-ին գնալ ընտրական տեղամասեր և քվեարկել «Լույս» դաշինքի օգտին, քվեարկել քաղաքապետի թեկնածու Արտակ Զեյնալյանի օգտին, քվեարկել պրոֆեսիոնալ թիմի օգտին, քվեարկել Երևանի արդար և արդյունավետ զարգացման օգտին, որովհետև մենք կարծում ենք, որ արդար և արդյունավետ կառավարումն է, որ այսքան ժամանակ պակասել է Երևանին»,-ասաց ցուցակի երկրորդ համարը զբաղեցնող Դավիթ Խաժակյանը:

Նա հայտնեց, որ «Լույս» դաշինքում այն մարդիկ են, ովքեր տիրապետում են քաղաքային տնտեսության խնդիրներին և դրանց լուծման բանաձևին. «Այդ բանաձևն է՝ «Երևան, «Լույս», Զեյնալյան»:

Քարոզարշավի ընթացքում «Լույս» դաշինքի քաղաքապետի թեկնածուին էին մոտենում տարբեր քաղաքացիներ իրենց ու Երևանին առնչվող խնդիրներով: Տարբեր փողոցներ ու բակեր շրջելով «Լույս» դաշինքը Նոր Նորքում ավարտեց քարոզարշավը: