ԲՀԿ-ն հայտարարում է պատերազմ այն հուսահատությանը, աղբին, այն պայմաններին, որում մեզ արդեն 30 տարի ստիպում են ապրել, ուրիշ պատերազմ մենք չունենք. Արման Աբովյան

19:53 • 17.09.18

Մի լավ հայերեն արտահայտություն կա՝ մի տանից չենք, մի հալի ենք: Նոր Նորքում այսօր Երևանի ավագանու քարոզարշավի շրջանակներում ասաց ավագանու ԲՀԿ–ական թեկնածու, կուսակցության երրորդ համար Արման Աբովյանը:

«Բոլորս էլ նույն տխրահռչակ «մարշրուտկեն» ենք նստում, բոլորս էլ նույն վերելակն ենք նստում մտածում կհասնե՞նք տեղ, թե՞ կընկնենք ներքև»,- ասաց նա:

Աբովյանի գնահատմամբ՝ այսօր քաղաքն աղետի մեջ է բոլոր առումներով` տրանսպորտի աղետ, բնապահպանական աղետ: Նա նկատեց, որ սոցցանցերում շրջանառվում է, թե ահա Հայաստանում նախընտրական պատերազմ է, կուսակցությունների անուններ են հնչեցվում:

«ԲՀԿ-ն հայտարարում է պատերազմ այն հուսահատությանը, աղբին, այն պայմաններին, որում մեզ արդեն 30 տարի ստիպում են ապրել, ուրիշ պատերազմ մենք չունենք: Մենք դատապարտված ենք հաղթելու»,- ասաց նա և ներկայացրեց իրենց քաղաքապետի թեկնածու Նաիրա Զոհրաբյանի հատկանիշները:

«Եթե մենք ուզում ենք մեր իրավիճակը շտկել, եթե ուզում ենք ապրել արժանապատիվ, ուրեմն՝ միանշանակ Նաիրա Զոհրաբյան»,- ասաց նա: