Հունվարից հասարակության որոշ շերտեր նաև ֆինանսական տեսքով փոփոխություններ կնկատեն. Մեսրոպ Առաքելյան

19:01 • 17.09.18

Տնտեսագետ, «Առաքելություն» կուսակցության անդամ, ՀՀ վարչապետի խորհրդական Մեսրոպ Առաքելյանը Tert.am-ի հետ զրույցում նշեց, որ վերջին ամիսներին թանկացումներ չեն գրանցվել, առավել ևս՝ Ազգային վիճակագրական ծառայության կողմից հրապարակված տվյալներն այլ բան են ասում. ընդհանուր սպառողական գների ինդեքսը անկում է ապրել նախորդ տարվա դեկտեմբերի նկատմամբ:

«Կարող է՝ ինչ-որ գյուղատնտեսական ապրանք, ինչ-որ բանջարեղեն կամ միրգ 200 դրամի փոխարեն դառնա երեք հարյուր դրամ, սակայն դա չի նշանակում, որ կյանքը թանկացել է, քանի որ հասարակության սպառման մեջ այդ ապրանքատեսակը շատ փոքր գումար է կազմում»,- ասաց նա:

Նա նշեց, որ կան ոլորտներ, որտեղ հնարավոր է որոշակի բարձրացումներ լինեն, և այդ ապրանքները զգայունություն են առաջացնում հասարակության մոտ, քանի որ դրանք  քանակական առումով ավելի շատ են գնում, սակայն մյուս կողմից պետք է նշել, որ նախկինում տեղի ունեցող անհարկի թանկացումները, մոնոպոլ դիրքի չարաշահումները այլևս Հայաստանում չկան, համապատասխան մարմիններն իրականացնում են պատշաճ վերահսկողություն, որպեսզի անհարկի թանկացումեր չլինեն:

«Իհարկե, տնտեսության մեջ դեռևս առկա են որոշակի խնդիրներ, որոնք ամբողջովին հնարավորություն չեն տալիս ունենալ այնպիսի մրցակցային դաշտ, որը կբերի գների ավելի նվազմանը, սակայն ներկայումս չկա կոռուպցիա, չկա հովանավորչություն, արտոնյալ կարգավիճակ ունեցողներ, և ցանկացած ոք կարող է ազատ ձեռնարկատիրությամբ զբաղվել»,- ասաց նա:

Մեսրոպ Առաքելյանը նշեց, որ ամեն դեպքում որոշ ոլորտներում հասարակության կողմից առկա մտահոգությունների հետ կապված դրական փոփոխություններ կլինեն:

Ինչ վերաբերում է այն դիտարկումներին, թե իշխանափոխությունից հետո մարդկանց կենսամակարդակը, կյանքի որակը չի բարձրացել, տնտեսագետն ասաց. ««Կյանքում ոչինչ չի փոխվել» արտահայտությունը բավականին ընդհանրական է, հասարակությունը երբ այդ տերմինը օգտագործում է, պետք  է հասկանանք, թե ինչ է ուզում, որ փոխվի: Եթե հասարակությունն սպասում է, որ Կառավարությունը պետք է մեկ օրում ֆինանսական օգնություն տա քաղաքացիներին, որ մարդիկ ավելի շատ եկամուտ ունենան, Կառավարությունը դրանով չի պատրաստվում զբաղվել: Կառավարությունն անելու է առավելագույնը, որ ՀՀ քաղաքացին հնարավորություն ունենա իր աշխատանքի միջոցով ստանալ արժանապատիվ եկամուտ, և շուկայական գների փոփոխությունը չազդի իր բարեկեցության վրա»,- ասաց նա:

Վարչապետի խորհրդականը պարզաբանեց, որ Կառավարության նպատակը ոչ թե այն է, որ աղքատները կարողանան ավելի էժան ապրանք գնել և ֆինանսական օգնություն ստանալ, այլ նախ և առաջ Կառավարության առաջնահերթությունը և աշխատաոճն ուղղված է աղքատության հաղթահարմանը աշխատանքի միջոցով:

«Այսինքն՝ հասարակությունը պետք է ունենա ավելի բարձր վարձատրվող աշխատանք, ավելի շատ  մարդիկ պետք է ներգրավված լինեն աշխատաշուկայում և շատ աշխատավարձ ստանան՝ հետևաբար հնարավորություն ունենալով նույնիսկ ավելի թանկ ապրանքներ գնելու: Այս ուղղությամբ քայլեր կատարվում են, և հունվարից որոշակիորեն դրական փոփոխությունների միջոցով հասարակության որոշ շերտեր նաև ֆինանսական տեսքով փոփոխություններ կնկատեն, այդ թվում՝ կախված հարկային օրենսգրքի փոփոխությունից, որոշակի հատվածի համար կենսաթոշակների բարձրացումից, և այդ ամենը կրելու է շարունակական բնույթ, և հասարակությունն անընդհատ զգալու է փոփոխություն կյանքի որակում»,- ասաց նա: