Հրազդանում շենքի պայթյունի փաստով հարուցված քրեական գործով տարբեր վարկածներ են շրջանառում, որոշ հանգամանքներ արդեն իսկ պարզվել են. ՔԿ
Կոտայքի մարզի Հրազդան քաղաքի Միքայելյան փողոցի բազմաբնակարան շենքում երեկ երեկոյան տեղի ունեցած պայթյունի փաստով ՀՀ քննչական կոմիտեում հարուցված է քրեական գործ, կատարվում է քննություն, նախնական տվյալները ստուգվում են:
Այս մասին Tert.am-ին հայտնեց Քննչական կոմիտեի նախագահի խորհրդական Սոնա Տռուզյանը։ Հիշեցնենք, որ ԱԻՆ աշխատակիցները պայթյունի վայրում հայտնաբերել էին ժամացույց՝ միացված էլեկտրական լարերով, 4 էլեկտրական և 4 կրակային ճայթիչ պայթուցիչներ, ավտոմեքենայի ազդանշանային համակարգի հեռակառավարման վահանակ՝ մարտկոցով, որոնք նախատեսված են եղել պայթեցման համար։
Հարցին, թե ինչ տվյալների մասին է խոսքը, Սոնա Տռուզյանը պատասխանեց. «Դեռևս չեմ կարող հրապարակել»: Ինչ վերաբերում է, թե ինչ վարկածներ են շրջանառում, ապա ՔԿ նախագահի խորհրդականն ասաց, որ տարբեր, որոշ հանգամանքներ արդեն իսկ քննության ժամանակ պարզվում են:
Քրեական գործը հարուցվել է Քրեական օրենսգրքի 185-րդ և 235-րդ հոդվածների հատկանիշներով, այն է` ուրիշի գույքը դիտավորությամբ ոչնչացնելը կամ վնասելը և ապօրինի զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը:










