Շվեյցարիան բարդացրել է ռուս դիվանագետների համար հավատարմագրման գործընթացը

13:27 • 17.09.18

Շվեյցարիան խստացրել է ռուս դիվանագետների համար հավատարմագրման գործընթացը: Այդ մասին «ՌԻԱ Նովոստի»-ին հայտնել են միջազգային հարցերով դաշնային դեպարտամենտի մամուլի ծառայությունում:

Գերատեսչությունում հաստատել են, որ գարնանից սկսած ռուս դեսպանը կամ ժամանակավոր հավատարմատարը երեք անգամ կանչվել են՝ Սկրիպալների գործով և Շպից քաղաքում լաբորատորիայի շուրջ ստեղծված իրավիճակի վերաբերյալ պարզաբանումներ տալու համար:

«ԱԳՆ-ն կոչ է արել Ռուսաստանին անմիջապես դադարեցնել Շվեյցարիայի տարածքում և շվեյցարական օբյեկտների դեմ անօրինական գործունեությունը»,- հայտարարել է նախարարության մամուլի ծառայության ներկայացուցիչ Պյեր-Ալեն Էլտշինգերը:

Նրա խոսքերով՝ Շվեյցարիան ողջ տեղեկությունը կիսում է գործընկեր պետությունների հետ:

«Միևնույն ժամանակ մենք կշարունակենք Ռուսաստանի հետ լավ հարաբերությունների պահպանմանն ուղղված ջանքերը»,- ընդգծել է Էլտշինգերը:

Ավելի վաղ շվեյցարական Tages Anzeiger թերթը հայտնել է, որ այժմ Շվեյցարիայում աշխատում են տասնյակ ռուս գործակալներ: Թերթի տեղեկություններով՝ երկրի ԱԳՆ-ն բազմիցս կանչել է ռուս դեսպանին և պահանջել է դադարեցնել անօրինական գործունեությունը: