Մենք ունենք առողջապահության ոլորտի տապալում. միայն ժողովրդահաճո որոշումներ կայացնելով, «Ֆեյսբուքում» հայտնի մարդկանց նշանակումով խնդիրները չեն լուծվում. Գևորգ Գրիգորյան

19:13 • 18.09.18

Առողջապահության նախարարության բարենպաստ պայմանը առաջնահերթ առողջապահության համակարգի բավարար ֆինանսավորումն է, որը չի եղել նախորդ կառավարության օրոք, չկա նաև հիմա:

Այս մասին Tert.am-ի հետ զրույցում ասաց ուրոլոգ, անդրոլոգ, առողջապահության կազմակերպիչ Գևորգ Գրիգորյանը՝ անդրադառնալով ՀՀ առողջապահության նախարար Արսեն Թորոսյանի ներկայացրած՝ ՀՀ որդեգրած ռազմավարության առաջնահերթություններին  և հայտարարությանը, թե ներկայումս Հայաստանում բարենպաստ պայմաններ են ստեղծվում առողջապահական համակարգի հետագա բարեփոխումների համար:

«Մինչ այս 2 տնօրեն է ազատվել աշխատանքից, խորհրդականներ են նշանակվել, և չեմ կարող ասել, որ տնօրենները անբարենպաստ պայմաններ կարող էին ստեղծել առողջապահության համակարգի գործունեության հետ կապված: Այն, որ շեշտվում է, թե ֆինանսներ են ավելացվելու, կենացների շարքին է պատկանում»,- ասաց  նա և նկատեց, որ ունենալով այդքան արտաքին պարտք՝ իրատեսական չէ, որ ավելացվի ֆինանսավորումը առողջապահության ոլորտում, սակայն այլ բան է, որ ֆինանսները ավելի ռացիոնալ օգտագործվեն:

«Չորս ամիս է անցել, որ ոլորտը նոր ղեկավարության ներքո է աշխատում, այսօր ունենք հոգեբուժության օրենքի բարեփոխումներ, հակածխախոտային օրենք, որը e-draft.am կայքում դրվեց առանց կողմ կամ դեմ քվեարկելու հնարավորության, ինչը ժողովրդավարության կոպիտ խախտում էր: Հակածխախոտային օրենքը նախարարության կողմից ուղիղ կերպով արվող լոբբինգ է՝ ի շատ տեղական արտադրողի : Հասկանում եմ, որ այդ արտադրողն առաջիններից մեկն է հայտարարել, որ հեղափոխության կողքին է կանգնած:

Բազմիցս շեշտել եմ, որ ներկայացվող ծրագրերը հանդիսանում են նախորդ կառավարության սկսած ծրագրերի շարունակությունը, և եթե, օրինակ, պարոն Թորոսյանը շարունակում է էլեկտրոնային առողջապահությունը՝ ձեռք բերելով հայկական արտադրության համակարգիչներ, դա չի նշանակում, որ դա իր սեփական նախագիծն է»,- ասաց նա:

Գևորգ Գրիգորյանը, խոսելով նախարարի ներկայացրած առաջնային պահպանման օղակի հզորացման, սքրինինգային ծրագրերի մասին, ասաց, որ բուժաշխատողները լիահույս են, որ մի բան կստացվի, բայց ըստ նրա՝ դժգոհության ալիքը բավականին մեծ է, և իր կոլեգաները գանգատվում են, որ փոփոխություն չկա, բայց ներկայացվում է որպես փոփոխություն:

Անդրադառնալով առաջնային բուժօգնության աշխատողների աշխատավարձերի բարձրացմանը՝ 10-15 տոկոսով, նա ասաց, որ  դա արվում է բնակչությանը հասնող անվճար դեղերի կրճատման հաշվին:

«15 տոկոս բարձրացումը կազմելու է 8-11 հազար դրամ, որը կոռուպցիոն ռիսկը չի վերացնում: Այդ բարձրացման պարագայում բուժաշխատողը ոչ թե հարկվելու է նախորդ 23 տոկոսի չափով, այլ արդեն հարկման շեմը բարձրանում է, և եթե դրան գումարում ենք սոցիալական վճարը, ստացվում է շատ փոքր գումար: Այսօր տասը հազար դրամով ի՞նչ կարող ենք անել. հասկանում եմ, որ բանանը բավականին էժան է, բայց տասը հազար դրամով որքա՞ն բանան ուտենք, ի՞նչ կենցաղային հարց կարող ենք լուծել»,- ասաց նա:

Բժիշկը նշեց, որ պետք է ունենանք նախարար, որը հասկանում է, որ ոլորտի քաղաքականությունը պայմանավորված չէ միայն իր ընկերներին կամ ընկերների ընկերներին աշխատանքով ապահովելու մեջ:

«Մենք ունենք առողջապահության ոլորտի տապալում, քանի որ միայն ժողովրդահաճո որոշումներ կատարելով, «Ֆեյսբուքում» հայտնի մարդկանց նշանակումով ոլորտում խնդիրները չեն լուծվում: Մենք օգտվում ենք նախորդ կառավարության բարքերից՝ քննադատելով նախորդ կառավարությունը, ժողովրդավարական լեզվով ասած՝ դա ուտել– ուրանալ է»,- ասաց նա: