«Իրենց դուռն է, ուզում են՝ խփում են». Նիկոլ Փաշինյանը՝ քաղաքացիների կառավարություն ներխուժելու փորձերի մասին
ՀՀ վարչապետ Նիկոլ Փաշինյանը կառավարության նիստից հետո իջավ շենքի մոտ բողոքի ցույց իրականացնող քաղաքացիների հետ հանդիպման և լսեց նրանց դժգոհությունները:
Մինչ այդ, ցույց անող արծվաշենցիները փորձել էին անցնել ոստիկանական պատնեշն ու մտնել Կառավարության շենք:
Արծվաշենցիները վարչապետին խնդրեցին իրենց բարձրացրած հարցին ուշադրություն դարձնել: Նշենք, որ 26 տարի առաջ՝ 1992 թվականի օգոստոսի 8-ին Ադրբեջանի էքսկլավից՝ հայկական տարածքից տեղահանված արծվաշենցիները փոխհատուցում են պահանջում:
Փաշինյանը փորձեց անձամբ հեռախոսազանգով պարզաբանում ստանալ հավաքված կանանցից մեկի խնդրի առնչությամբ:
Մի խումբ քաղաքացիներ էլ դժգոհեցին, որ բանկերից մեկն իրենց տներն իրենց ձեռքից անօրինական ճանապարհով խլել է, այն դեպքում, երբ մարդիկ այդ տանն ապրում են: «Համլետ Ամիրխանյանը ինքնասպանությունից առաջ գրել է՝ ով է իրենց «գցել», բոլոր գործերը ԱԱԾ-ում են, խնդրում ենք, մեր գործն ընդառաջեք»,-ասաց քաղաքացիներից մեկը:
Վարչապետը նշեց, որ խնդիրը պետք է օրինական դաշտում լուծվի:
Մայրաքաղաք էին եկել նաև Արմավիր մարզից քաղաքացիներ, ովքեր դժգոհում էին մարզի «ԲՀԿ-ականացվելուց»: Նրանք դժգոհ էին Արմավիր գյուղի՝ ԲՀԿ-ն ներկայացնող գյուղապետից:
Մի կին էլ հայտարարեց, որ իր տունն իր ձեռքից խլել են: Նիկոլ Փաշինյանը հորդորեց կնոջը ուղեկցել դատախազություն կամ մոտակա ոստիկանական բաժին՝ հանցագործության մասին հաղորդում տալու:
Կինը, Փաշինյանին հրաժեշտ տալուց առաջ, հորդորեց զբաղվել սեփական անվտանգությամբ. «Խնդրում եմ, անվտանգությանդ ուշադրություն դարձրու, քոնն էլ, Վանեցյանին էլ, Խաչատրյանին էլ»:
Ի դեպ, լրագրողների հարցին, թե ինչպես կմեկնաբանի ակցիայի մասնակիցների քայլերը՝ բռնությամբ կառավարության շենք ներխուժելու փորձը, վարչապետը պատասխանեց. «Իրենց դուռն է, ուզում են՝ խփում են»:










