Նոր Զելանդիայի վարչապետը դարձել է պատմության մեջ նորածնի հետ ՄԱԿ-ի ԳՎ այցելած առաջին ղեկավարը (լուսանկարներ)
Նոր Զելանդիայի վարչապետ Ժասինդա Արդենը դարձել է պատմության մեջ առաջին կին ղեկավարը, որը ՄԱԿ-ի Գերագույն վեհաժողով է գնացել նորածին դստեր հետ, գրում է The Guardian-ը:
Արդենը երեխայի հետ է ներկայացել Նյու Յորքում ՄԱԿ-ի Գլխավոր վեհաժողովի շրջանակում Նելսոն Մանդելային նվիրված խաղաղության գագաթաժողովին, որի մեկնարկից առաջ ուրախ խաղացել է փոքրիկի հետ, իսկ հետո ելույթ ունեցել հեղինակավոր ամբիոնից:
Մինչ վարչապետը ելույթ է ունեցել, նրա զուգընկերը՝ Քլարք Գեյֆորդը, պահել է երեք ամսական երեխային՝ Նիվ Տե Արոհային:
Հատկանշական է, որ Արդենը Նոր Զելանդիայից Նյու Յորք հասնելու համար երեխայի հետ 17 ժամ ինքնաթիռում է անցկացրել:
Նա մանրամասնել է, որ երեխայի խնամքով զբաղվում է առավելապես փոքրիկի հայրը՝ Գեյֆորդը:
Ի դեպ, վերջինս պատմել է, թե որքան մեծ է եղել ՄԱԿ-ի ԳՎ-ին մասնակցող ճապոնական պատվիրակության անդամների զարմանքը, երբ նրանք մտել են հանդիպման սենյակ ու այնտեղ տեսել նորածնի տակդիրը փոխող վարչապետին ու նրա կողակցին:
Հիշեցնենք, որ Արդենն իր առաջնեկին լույս աշխարհ է բերել հունիսի 21-ին: Դրանից վեց շաբաթ անց նա աշխատանքի է վերադարձել:















