Նորվեգիայի հատուկ ծառայություններն Օսլոյում ձերբակալված ՌԴ քաղաքացուն կասկածում են լրտեսության համար
Նորվեգիայի անվտանգության ոստիկանական ծառայությունը (PST) կասկածում է, որ Օսլոյի օդանավակայանում ձերբակալված Ռուսաստանի քաղաքացի, ՌԴ դաշնային խորհրդի աշխատակազմի տեխնիկակակն աշխատակից Միխայիլ Բոչկարյովը Նորվեգիայում տեղեկություններ է հավաքել անլար ցանցերի միջոցով: Այդ մասին հայտնել է Ռուսաստանի քաղաքացու փաստաբան Բենդիկ Ֆալկ-Կուսլունգը, գրում է ТАСС-ը:
«PST-ի կասկածներն, ի թիվս այլնի, վերաբերում են անլար ազդանշաններով և ցանցով Սթորթինգի (Նորվեգիայի խորհրդարան) շենքում տվյալներ հավաքելուն: Նա հերքում է, որ նման գործողություններ է իրականացրել»,- հայտարարել է Ֆալկ-Կուսլունգը:
Ավելի վաղ հաղորդվել է, որ 51-ամյա Բոչկարյովի այցից հետո Սթորթինգի վարչակազմն արգելք է սահմանել շենքում պրինտերների օգտագործման համար, քանի որ սարքերի կոշտ սկավառակների վրա պահպանվում են խորհրդարանի բոլոր փաստաթղթերը, որոնք կարող էին ենթադրյալ հարձակման թիրախը լինել: Նորվեգիայի ազգային անվտանգության վարչության տեխնիկական փորձագետները նաև փորձում են պարզել, թե արդյոք Բոչկարյովը կարող էր խորհրդարանում լրտեսող սարքեր թողնել:
Նորվեգիայում ՌԴ դեսպանատունը պահանջել է չեղարկել ՌԴ քաղաքացու նկատմամբ սահմանված մեղադրանքները և նրան ազատ արձակել:










