Սերգեյ Սկրիպալն աշխատել է ՆԱՏՕ-ի 4 երկրի հետախուզական ծառայությունների համար. Focus
Գերմանական Focus թերթը ՆԱՏՕ-ի Հակահետախուզության միացյալ հրամանատարությունում (ACCI) աղբյուրի հղումով գրում է, որ ռուսական հետախուզության նախկին աշխատակից Սերգեյ Սկրիպալը մինչև 2017 թվականն աշխատել է դաշինքի 4 երկրի հետախուզական ծառայությունների համար:
«Միևնույն ժամանակ, նա բացահայտել է Գլխավոր հետախուզական վարչության մի քանի ակտիվ լրտեսի»,- գրում է թերթը՝ Բրյուսելում ACCI-ի բարձրաստիճան աշխատակցի հղումով:
Նշվում է, որ 2012 թվականին Սկրիպալը բրիտանական MI6 հետախուզական ծառայության աշխատակիցների ուղեկցությամբ իբր եղել է Պրահայում և տեղեկացրել տեղական պետանվտանգության մարմիններին ռուսական հետախուզական ցանցի ակտիվ գործունեության մասին:
Բացի այդ, 2016 թվականի ամռանը Սկրիպալն իբր էստոնիայի հատուկ ծառայություններին այնքան ճիշտ տեղեկություններ է հայտնել, որ նրանց հաջողվել է բացահայտել 3 «ռուսական լրտեսի», որոնց թվում եղել է Էստոնիայի բանակի՝ ռուսական ծագմամբ մեկ սպա և նրա հայրը:
Նշվում է նաև, որ Սկրիպալը տեղեկություններ է հաղորդել Իսպանիայի հետախուզության ազգային կենտրոնին (CNI):
Հիշեցնենք, որ Մեծ Բրիտանիայի օգտին լրտեսման համար ՌԴ-ում դատապարտված Սերգեյ Սկրիպալն ու իր դուստրը մարտի 4-ին անգլիական Սոլսբերի քաղաքում թունավորվել են իրենց տան բռնակին քսված նյարդապարալիտիկ նյութով:
Պաշտոնական Լոնդոնը պնդում է, որ հարձակման հետևում կանգնած է Մոսկվան: Ռուսաստանը կտրուկ հերքում է մեղադրանքը:
Ավելի ուշ բրիտանական կողմը հայտարարել է, որ Սկրիպալների թունավորման գործում գլխավոր կասկածյալներ Ալեքսանդր Պետրով ու Ռուսլան Բոշիրով անուններով ներկայացող անձինք Գլխավոր հետախուզական վարչության գաղտնի գործակալներ են:










