Իլոն Մասկը կլքի Tesla-ի տնօրենների խորհրդի նախագահի պաշտոնը

11:29 • 30.09.18

Tesla-ի հիմնադիր Իլոն Մասկը և ԱՄՆ արժեթղթերի և բորսաների հարցերով հանձնաժողովը (SEC) նախադատական կարգով կարգավորել են ընկերությունը փակ դարձնելու մտադրության մասին հայտարարությունների պատճառով Մասկի դեմ առաջադրված խարդախության մասին մեղադրանքները, հայտնում է CNN-ը:

Մասկը կմնա Tesla ընկերության ղեկավարներից մեկը, սակայն ստիպված կլինի առնվազն երեք տարով հրաժարվել տնօրենների խորհրդի նախագահի պաշտոնից: Նրան կփոխարինեն անկախ նախագահով:

Tesla-ն նաև պետք է երկու նոր անկախ տնօրեն նշանակի: Պայմանավորվածությունների ևս մեկ կետ ենթադրում է Մասկի հաղորդագրությունների վերաբերյալ վերահսկողության նպատակով քայլերի ձեռնարկում:

Բացի դրանից, գործարարը պետք է վճարի 20 միլիոն դոլարի չափով տուգանք: Tesla-ն իր հերթին պետք է նույնչափ գումար վճարի որպես տուգանք:

SEC-ը հույս ունի, որ այդ քայլերը կկանխեն շուկայի գործունեության հետագա խափանումները և Tesla-ի բաժնետերերի համար բացասական հետևանքները:

Այս պայմանավորվածությունները դեռևս պետք է հաստատվեն դատարանի կողմից:

Մասկի դեմ գործը սկսվել է «սուտ և շփոթեցնող» մի շարք հայտարարություններից հետո, որոնք գործարարն արել է բաց բաժնետիրական ընկերություն հանդիսացող Tesla-ն փակ դարձնելու մտադրության առնչությամբ: Հինգշաբթի հանձնաժողովը հայց է ներկայացրել Նյու Յորքի դատարան բաժնետոմսերը հետ գնելու մտադրության մասին նրա հայտարարությունների առնչությամբ: