Հռոմի պապը կոչ է արել հոկտեմբերին ամեն օր աղոթել Եկեղեցու պաշտպանության համար
Հռոմի պապ Ֆրանցիսկոսը դիմել է աշխարհի կաթոլիկներին՝ կոչ անելով հոկտեմբեր ամսվա ընթացքում ամեն օր աղոթել ի պաշտպանություն Կաթոլիկ եկեղեցու, որը վերջին շրջանում հայտնվել է մանկապղծության վերաբերյալ աղմկահարույց սկանդալների կենտրոնում:
Ինչպես նշում է Daily Mail-ը, պոնտիֆիկոսն ասել է, որ «աղոթքներն անհրաժեշտ են Եկեղեցուն չարիքից, սատանայից հեռու պահելու համար»: Նա ընդգծել է, որ «անկեղծ աղոթքը չարիքի դեմ միակ հզոր զենքն է»:
Պարբերականը մանրամասնում է, որ Հռոմի պապը կոչ է արել վարդարանով (ավանդական կաթոլիկ համրիչ, որն օգտագործվում է Աստվածամորը նվիրված «Վարդարանի աղոթքը» կատարելու համար) աղոթել ու խնդրել Մարիամ Աստվածածնին ու Սբ Միքայել հրեշտակապետին պաշտպանել Եկեղեցուն «հոգևոր անկայունության» այս շրջանում:
Հիշեցնենք, որ վերջին մի քանի ամիսներին Կաթոլիկ եկեղեցու մի քանի բարձրաստիճան ծառայող պաշտոնանկ է արվել մանկապղծության մեղադրանքով:
Բացի այդ, պարզվել է, որ աշխարհի տարբեր երկրներում հոգևորականները տասնամյակներ շարունակ սեռական ոտնձգություններ են կատարել հազարավոր անչափահասների նկատմամբ: Միայն Գերմանիայում Կաթոլիկ եկեղեցու ծառայողները 1946-2014թթ. ընթացքում մանկապղծության զոհ են դարձրել մոտ 3.700 երեխայի:










