Ազնավուրի ընտանիքը, Ելիսեյան պալատը և ՀՀ նախագահի ու կառավարության խորհրդականները քննարկում են շանսոնյեին հրաժեշտի արարողության մանրամասները. RTL

Չնայած այն հանգամանքին, որ բազմաթիվ կոչեր են հնչել ֆրանսահայ մեծանուն երգիչ Շառլ Ազնավուրի հրաժեշտի ազգային արարողություն կազմակերպելու վերաբերյալ, ֆրանսիական RTL լրատվամիջոցը նշում է, որ իր տեղեկությունների համաձայն՝ Ազնավուրի ընտանիքը դեմ է նման միջոցառման կազմակերպմանը:

Հրաժեշտի ազգային արարողության կազմակերպմանը կողմ արտահայտվածներից մեկն է նաև Ֆրանսիայի նախկին նախագահ Ֆրանսուա Օլանդը, որը նշել է, սակայն, որ դա «մեծ մասամբ կախված է նրա ընտանիքի ցանկությունից»:

Թե արդյոք պետք է կազմակերպվի հրաժեշտի ազգային արարողություն, թե սովորական արարողություն, կամ պարզապես պետք է հնչի միայն երկրի ղեկավարի խոսքը, դեռ պարզ չէ:

«Ոչինչ դեռ որոշված չէ, քանի դեռ քննարկումներ են ընթանում շանսոնյեի ընտանիքի և Ելիսեյան պալատի, ինչպես նաև Հայաստանի նախագահի և կառավարության խորհրդականների միջև»,- գրում է լրատվամիջոցը:

RTL-ը նշում է, որ այժմ հայտնի է միայն, որ Հայաստանում նախատեսվում է Ազնավուրի հուղարկավորության օրը սգո օր հայտարարել: Հուղարկավորության օրը, սակայն, դեռ հայտնի չէ:

Հոկտեմբերի 1-ին կյանքից հեռացել է աշխարհահռչակ ֆրանսահայ շանսոնյե Շառլ Ազնավուրը. նա 94 տարեկան էր: Երգիչը մահացել է Ֆրանսիայի հարավ-արևելքում գտնվող Մուրիես քաղաքի իր տանը՝ քնած ժամանակ: