Սուլավեսի կղզու բնակիչներին խորհուրդ են տվել 4 կմ շառավղով հեռավորություն պահպանել ժայթքած հրաբխի տարածքից (լուսանկարներ)
Ինդոնեզիայի Սուլավեսի կղզում, որտեղ անցած շաբաթ ավելի քան 1300 մարդ է զոհվել երկրաշարժերի և դրանց հաջորդած ցունամիի հետևանքով, Սոպուտան հրաբխի ժայթքման հետևանքով բնակիչներին խորհուրդ է տրվել զգուշանալ հրաբխային մոխրից և 4 կմ շառավղով հեռավորություն պահպանել տարածքից, գրում է The Daily Mail-ը:
Ավելի վաղ հաղորդվել է, որ նախորդ շաբաթ հզոր երկրաշարժից ու ցունամիից տուժած ինդոնեզական Սուլավեսի կղզում չորեքշաբթի՝ հոկտեմբերի 3-ին, հրաբուխ է ժայթքել և հերթական երկրաշարժն է գրանցվել:
Կղզու վրա գտնվող հրաբուխներից Սոպուտանի ժայթքման հետևանքով մոխրի հսկայական սյուն է առաջացել, որի բարձրությունը շուրջ 4 կմ է:
Նույն օրը Կենտրոնական Սուլավեսի նահանգում գրանցվել է հերթական երկրաշարժը՝ 4.8 մագնիտուդ ուժգնությամբ: Ինդոնեզիայի օդերևութաբանության, կլիմայի և երկրաֆիզիկայի գործակալության տվյալներով՝ երկրաշարժի էպիկենտրոնը գտնվել է Պալու քաղաքից 20 կմ հեռավորության վրա, իսկ օջախը՝ 10 կմ խորության վրա:














