Կառավարության նիստը՝ ուղիղ. օրակարգում են մարզպետների՝ պաշտոնից ազատելու որոշման նախագծերը
Մեկնարկել է ժամանակավոր, համաձայնության կառավարության հերթական նիստը, որի օրակարգում ընդգրկված է 34 հարց, որոնցից 22-ը չզեկուցվող է:
Հարցերի ցանկում ներառված են Արագածոտնի, Լոռու, Վայոց ձորի, Արմավիրի և Գեղարքունիքի մարզպետներին պաշտոնից ազատելու մասին որոշման նախագծերը: Նշենք, որ նրանք ՀՅԴ-ական և ԲՀԿ-ական մարզպետներ են:
Օրակարգում է նաև քրեակատարողական ծառայողի օրը նշելու մասին, պարտադիր զինվորական ծառայության զորակոչի անցկացման կարգը հաստատելու մասին, «Հայաստանի Հանրապետության տոների և հիշատակի օրերի մասին» ՀՀ օրենքում լրացում կատարելու մասին որոշման նախագծերը: Կառավարությունը Ազգային ժողովի նախագահին կառաջարկի 2018 թվականի հոկտեմբերի 5-ին՝ ժամը 11։00- ին գումարել Հայաստանի Հանրապետության Ազգային ժողովի արտահերթ նիստ։
Նախատեսվում է Ֆրանկոֆոնիայի 17-րդ գագաթնաժողովի օրերը` հոկտեմբերի 11-12-ը, լինեն ոչ աշխատանքային:
Հիշեցնենք, որ վարչապետի որոշմամբ պաշտոնից ազատվել են ՀՅԴ-ական նախարարները` գյուղատնտեսության նախարար Արթուր Խաչատրյանը և տնտեսական զարգացման և ներդրումների նախարար Արծվիկ Մինասյանը, ինչպես նաև ԲՀԿ-ական նախարարները` ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը, արտակարգ իրավիճակների նախարար Հրաչյա Ռոստոմյանը, սպորտի և երիտասարդության նախարար Լևոն Վահրադյանը, տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը։










