Մեքսիկայում կրկին լրագրող է սպանվել

02:42 • 04.10.18

Մեքսիկայում կրկին լրագրող է սպանվել: Ինչպես հաղորդում է Excelsior պորտալը, հերթական զոհը «Enfoque» պարբերականի հիմնադիր ու լրագրող Սերխիո Մարտինես Գոնսալեսն է, ով սպանվել է չորեքշաբթի՝ հոկտեմբերի 3-ին:

Պորտալի հաղորդմամբ՝ լրագրողին գնդակահարել են Չիապաս նահանգի Տուստլա Չիկո քաղաքի ռեստորաններից մեկում: Լրագրողի հետ է եղել նաև նրա կինը, ով վնասվածքներ է ստացել և գտնվում է հիվանդանոցում:

Ավելի վաղ Մարտինես Գոնսալեսը գրել է սոցցանցերում, որ սպառնալիքներ է ստացել անհայտ անձանցից և իշխանությունների օգնությունն է խնդրել:

Հիշեցնենք, որ նմանատիպ դեպք տեղի է ունեցել նաև օրեր առաջ՝ սեպտեմբերի 21-ին, երբ նույն Չիապաս նահանգում անհայտ անձինք գնդակահարել են Heraldo de Chiapas պարբերականի թղթակից Մարիո Գոմեսին:

Վերջին տարիներին Մեքսիկայում կտրուկ աճել է բռնությունների թիվը, ինչը հիմնականում պայմանավորված է նարկոկարտելների միջև պայքարով՝ ԱՄՆ կոկաինի տարանցման նկատմամբ հսկողության համար։ Մեքսիկայի Մարդու իրավունքների պաշտպանության ազգային հանձնաժողովի տվյալներով՝ 2000 թվականից ի վեր երկրում սպանվել է 138 լրագրող, իսկ 2005 թվականից ի վեր անհայտ կորած է համարվում զանգվածային լրատվամիջոցների 21 աշխատակից: