Նիդեռլանդները մեղադրել են հետախուզական վարչության աշխատակիցներին MH17-ի կործանման մասին տեղեկությունը գողանալու փորձի համար
Նիդեռլանդների պաշտպանության նախարար Անկ Բեյլեվելդը հայտարարել է, որ ռուսական գլխավոր հետախուզական վարչության աշխատակիցները փորձել են տեղեկություներ ձեռք բերել Դոնբասում մալայզիական ինքնաթիռի կործանման մասին միջազգային հետաքննությունից:
Այդ մասին հայտնում է Associated Press գործակալությունը: Այդ մասին տեղեկությունը գտնվել է ռուսներից մեկի նոթբուքում, որոնց արտաքսել են երկրից Քիմիական զենքի արգելման կազմակերպության վրա կիբերհարձակում կազմակերպելու փորձի պատճառով, գրում է tvrain.ru-ն:
«Մենք գիտեինք, որ ռուսական հետախուզական ծառայությունները հետաքրքրված են այդ հետաքննությամբ և համապատասխան միջոցներ ենք ձեռնարկել»,- ասել է պաշտպանության նախարարը:
Ռուսաստանի չորս քաղաքացիները արտաքսվել են 2018 թվականի ապրիլին: Նիդեռլանդների իշխանությունները հայտնել են, որ կասկածյալները նաև փորձել են կազմակերպել Քիմիական զենքի արգելման կազմակերպության վրա կիբերհարձակում: Մամուլի ասուլիսի ժամանակ հայտարարվել են նրանց անունները: Նիդեռլանդների տեղեկություններով՝ նրանք դիվանագիտական անձնագրեր են ունեցել:
Ավելի վաղ հաղորդվել է, որ միջազգային քննչական խումբը պարզել է, որ «Բուկ» զենիթահրթիռային համալիրը, որից ենթադրաբար Ուկրաինայի արևելքում կործանվել է մալայզիական ինքնաթիռը, պատկանել է ռուսական զինված ուժերին:
Փորձագետներն ուսումնասիրել են բոլոր հասանելի պատկերները և պարզել են, որ «Բուկ»-ն ունի մի շարք յուրահատկություններ: Ինչպես հայտնել է Նիդեռլանդների ներկայացուցիչն ինքնաթիռի կործանման երկրորդ հետաքննության նախնական արդյունքների ներկայացման ընթացքում, դրանց միջոցով խումբը կարողացել է ստանալ մատնահետքերը և պարզել է, որ զենիթահրթիռային համալիրը եկել է «Ռուսաստանի Դաշնության Կուրսկ քաղաքի 53-րդ զենիթային բրիգադից»:
ՌԴ ՊՆ-ում պնդում են, որ «Բուկ»-ը պատկանել է Ուկրաինային:
Ամստերդամից Կուալա Լումպուր թռչող մալայզիական Boeing 777-ը կործանվել է 2014 թվականի հուլիսի 17-ին՝ Ուկրաինայի արևելքում՝ Դոնեցկի երկնքում: Ինքնաթիռում եղել է 298 մարդ, նրանք բոլորը զոհվել են:










