Ավիավթարի հետևանքով զոհված ՌԴ գլխավոր դատախազի տեղակալ Սահակ Կարապետյանը համակարգում էր Սկրիպալների դեմ մահափորձի հետաքննությունը. «Ինտերֆաքս»
ՌԴ Կոստրոմայի մարզում ուղղաթիռի կործանման հետևանքով մահացած ՌԴ գլխավոր դատախազի տեղակալ Սահակ Կարապետյանը համակարգում էր առավել աղմկահարույց քրեական գործերի, այդ թվում՝ Սկրիպալների գործի հետաքննության վերահսկողությունը: Այդ մասին «Интерфакс» գործակալությանը հայտնել է աղբյուրը:
«2006 թվականից Սահակ Կարապետյանը զբաղեցնում էր ՌԴ գլխավոր դատախազության միջազգային-իրավական համագործակցության գլխավոր վարչության ղեկավարի պաշտոնը, իսկ 2016 թվականից, դառնալով գլխավոր դատախազի տեղակալ, համակարգում էր «աղմկահարույց» գործերը, այդ թվում՝ անգլիական Սոլսբերի քաղաքում Յուլյա Սկրիպալի դեմ մահափորձի հետաքննությունը»,- հայտնել է գործակալության զրուցակիցը:
Գործակալությունը, վկայակոչելով աղբյուրին, հայտնում է, որ ուղղաթիռի կործանման նախնական պատճառը երեկոյան ժամերին ծառերի կատարներին բախվելն է եղել:
Ավելի վաղ հաղորդվել է, որ նախօրեին Ռուսաստանի Կոստրոմայի մարզում AS 350 B3 ուղղաթիռի կործանման զոհերից մեկը Ռուսաստանի Դաշնության գլխավոր դատախազի տեղակալ, գեներալ Սահակ Կարապետյանն է: Վթարի հետևանքով մահացել է 3 մարդ: Որոշ աղբյուրներ նշում են, որ բացի Սահակ Կարապետյանից, եղել է ևս մի հայ՝ Արեգ Հարությունյանը (Арэк Аратюнян):
«Heliport Москва» համալիրին պատկանող ուղղաթիռն ուղևորվելիս է եղել Սպասսկոյե գյուղական համայնք, սակայն չհասնելով նշանակված վայր՝ կործանվել է Վոնիշևո գյուղի մոտակայքում:
Հիշեցնենք, որ Մեծ Բրիտանիայի օգտին լրտեսման համար ՌԴ-ում դատապարտված Սերգեյ Սկրիպալն ու իր դուստրը մարտի 4-ին անգլիական Սոլսբերի քաղաքում թունավորվել են իրենց տան բռնակին քսված նյարդապարալիտիկ նյութով:
Պաշտոնական Լոնդոնը պնդում է, որ հարձակման հետևում կանգնած է Մոսկվան: Ռուսաստանը կտրուկ հերքում է մեղադրանքը:
Ավելի ուշ բրիտանական կողմը հայտարարել է, որ Սկրիպալների թունավորման գործում գլխավոր կասկածյալներ Ալեքսանդր Պետրով ու Ռուսլան Բոշիրով անուններով ներկայացող անձինք Գլխավոր հետախուզական վարչության գաղտնի գործակալներ են:










