Սկրիպալը հրաժարվել է ԱՄՆ տեղափոխվել. բրիտանացի լրագրող

11:02 • 04.10.18

Անգլիական Սոլսբերիում թունավորված ռուս նախկին հետախույզ Սերգեյ Սկրիպալը չի ցանկանում այլ երկիր մեկնել: Այդ մասին հայտնել է Skripal Files գրքի հեղինակ, բրիտանական BBC հեռուստառադիոընկերության լրագրող Մարկ Ուրբանը, գրում է «ՌԻԱ Նովոստի»-ն:

«Տուն Սկրիպալի վերադարձի հարց չկա, նրա տունը կզբաղեցնեն բրիտանացի հարկատուները, այդ փողոցի վրա (Սոլսբերիում) նրա կյանքն ավարտված է… »,- ասված է գրքում:

Ուրբանը գրում է, որ այժմ Սկրիպալը և նրա դուստր Յուլյան մնում են ոստիկանության պաշտպանության տակ, բայց դա չի կարող երկար շարունակվել: Այդ պատճառով, ինչպես նշում է լրագրողը, բաց է հարցը, թե որտեղ նրանք պետք է ապրեն:

«Մինչ Սկրիպալները հիվանդանոցում էին, Դաունինգ սթրիթում առաջարկներ էին հնչում, որ նրանք մեկնեն Ամերիկա կամ մեկ այլ անգլախոս երկիր և նոր անձնական տվյալներ ստանան»,- ասել է հեղինակը և հավելել, որ նրանք բացասական են ընդունել այդ գաղափարը:

Skripal Files գիրքը գրվել է նախկին հետախույզի հետ զրույցների հիման վրա: Այն վաճառքի է դուրս եկել հինգշաբթի:

Հիշեցնենք, որ Մեծ Բրիտանիայի օգտին լրտեսման համար ՌԴ-ում դատապարտված Սերգեյ Սկրիպալն ու իր դուստրը մարտի 4-ին անգլիական Սոլսբերի քաղաքում թունավորվել են իրենց տան բռնակին քսված նյարդապարալիտիկ նյութով:

Պաշտոնական Լոնդոնը պնդում է, որ հարձակման հետևում կանգնած է Մոսկվան: Ռուսաստանը կտրուկ հերքում է մեղադրանքը:

Ավելի ուշ բրիտանական կողմը հայտարարել է, որ Սկրիպալների թունավորման գործում գլխավոր կասկածյալներ Ալեքսանդր Պետրով ու Ռուսլան Բոշիրով անուններով ներկայացող անձինք Գլխավոր հետախուզական վարչության գաղտնի գործակալներ են: