ԱՄՆ-ում սպանվել է ռեփեր Hollywood Play-ը

02:55 • 08.10.18

Նյու Յորքում անհայտ անձը գնդակահարել է 35-ամյա ռեփեր Ֆրենկ Սնայդերին, ով հայտնի էր Hollywood Play բեմական կեղծանունով, գրում է New York Post-ը:

Նշվում է, որ երաժիշտը կանգնած է եղել Tavern Lounge ակումբի մոտ, երբ նրան մոտեցած սև ավտոմեքենայից դուրս է եկել մի տղամարդ և կրակ բացել ակումբի ուղղությամբ:

Սնայդերը վնասվածքներ է ստացել ոտքի և պարանոցի հատվածում: Նրան շտապ տեղափոխել են հիվանդանոց, սակայն այնտեղ բժիշկները գրանցել են նրա մահը:

Ակումբի աշխատակիցներից մեկի խոսքով՝ հարձակվողի նպատակը հենց Սնայդերին սպանելն է եղել, սակայն ոստիկանությունն առայժմ չի հաստատել այդ տեղեկությունը:

Պարբերականն ընդգծում է, որ Tavern Lounge-ում երաժիշտը մտադիր էր անցկացնել երեկույթ՝ իր ծննդյան օրվա առթիվ, ինչի մասին են վկայում ավելի վաղ սոցցանցերում նրա արած հրապարակումները: