Մարալիկում կրկին լարված իրավիճակ է. քաղաքապետարանի դուռը փակ է, իսկ քաղաքապետի կողմնակիցներն էլ խոստանում են պարալիզացնել երկաթգիծը

11:43 • 08.10.18

Երկուշաբթի առավոտյան Մարալիկի Հանրապետական քաղաքապետ Արտակ Գևորգյանի հրաժարականը պահանջող մարալիկցիները թմբուկներով երթով շարժվեցին դեպի քաղաքապետարան. նրանք շարունակում են պահանջել քաղաքապետի հրաժարականը:

Երթի ընթացքում մասնակիցները բարձրախոսով հարցնում էին. «Ո՞վ է տերը մեր համայնքի»: Ապա իրենք էլ վանկարկում. «Մենք ենք տերը մեր համայնքի»:

Հիշեցնենք, որ  Մարալիկի ՀՀԿ-ական քաղաքապետի հրաժարականը պահանջող մարալիկցիները գրեթե 10 օր փակած են պահում  քաղաքապետարանի մուտքերը, ինչի հետևանքով քաղաքապետարանի աշխատակազմը չի կարողանում մուտք գործել շենք, ներառյալ քաղաքապետ Արտակ Գևորգյանը: Ինքը ՝ Արտակ Գևորգյանը, Tert.am-ին հայտնել էր, որ չի պատրաստվում 15-20 հոգու պահանջով հրաժարական տալ, քանի որ ժողովրդի կողմից ստացել է ընտրություններում վստահության քվեն:

Արդեն քաղաքապետարանի մոտ ցույցի՝ եռագույններով ու Հայաստանի պետական դրոշներով փաթաթված մասնակիցները պարզեցին «ՀՀԿ հեռացիր» կարգախոսներով պաստառները, միացրեցին ՀՀ պետական օրհներգն ու շարունակեցին այդ կերպ պահանջել համայնքապետի հրաժարականը: Ինչպես նախորդ օրերին, քաղաքապետարանի դուռը այսօր ևս փակված է նստարանով ու աթոռներով:

«Բռնակալ էր, կաշառակերություն, թալանչիություն էր անում»,- ասաց մի մարալիկցի տղամարդ: Իսկ մյուսն էլ շարունակեց. «Մի փոքր վերլուծենք մեր հակառակորդի վերջին օրերի պահվածքը: Նախորդ արատավոր համակարգի ճորտերը, ստրուկները ձեռքները ծալած չէին նստելու, առավել  ևս իրենք էլ գլխի չեն, իրենց հրահանգում է  քաղաքական դիակ կուսակցության ղեկավար թևը, և Գևորգյան Արտակի շրջապատն անցավ գործողությունների»:

Հավաքվածները գոռում էին «ամոթ», ինչին ի պատասխան՝ մարալիկցին նշեց. «Ժողովո՛ւրդ, իրենք ամոթ չունեն: Մարդիկ խոստացան (Արտակ Գևորգյանի կողմնակիցները-խմբ ) պարալիզացնել մայրուղիներում երթևեկությունը, երկաթգիծը, որն արդեն 1991-ից չի աշխատում, թե ինչն են պարալիզացնում՝ չգիտեն, նավահանգիստը, օդանավակայանը և, երևի, Կոմերիտականների փողոցը: Երևի մետրոյով էլ գային Մարալիկ իրենց աջակցելու»:

Տղամարդը նկատեց, որ  եթե հանրապետականները ճանապարհ փակեն, ապա իրենք կգնան «ճանապարհը փակել են հանրապետականի թշվառ մնացորդները» կարգախոսներով, և նրանց ճամփա փակելը կտևի 5 րոպե ու կավարտվի խայտառակությամբ:

Նա կոչ արեց մարալիկցներին ավելի ակտիվ լինել, որ «մնացորդային երևույթներին ուղարկենք» պատմության աղբամանը: