Բրազիլիայում ավելի քան 180 մարդ է ձերբակալվել ընտրախախտումների համար
Բրազիլիայում կիրակի՝ հոկտեմբերի 7-ին անցկացված համընդհանուր ընտրությունների ընթացքում ավելի քան 180 մարդ է ձերբակալվել ընտրախախտումների համար, հաղորդում է РИА Новости-ն:
Տեղական ժամանակով ժամը 17.00-ի դրությամբ, երբ ընտրատեղամասերի մեծ մասն արդեն փակված էր, արդեն իսկ ընտրական կարգի խախտման համար դատական գործ է հարուցվել 177 ընտրողի դեմ: Նույն հանցանքի համար կասկածվում է նաև 6 թեկնածու:
Նշվում է նաև, որ տեխնիկական անսարքությունների պատճառով տարբեր ընտրատեղամասերում ստիպված են եղել փոխել 1695 էլեկտրոնային քվեատուփ, ինչը կազմում է օգտագործվող էլեկտրոնային քվեատուփերի ընդհանուր քանակի 0.33%-ը:
Հիշեցնենք, որ Բրազիլիայում համընդհանուր ընտրություններն անցկացվել են հոկտեմվերի 7-ին. երկրի բնակիչներն ընտրում էին նոր նախագահին, փոխնախագահին, Ազգային կոնգրեսի (խորհրդարան) կազմը, նահանգապետերի և փոխնահանգապետերի:
Նախագահի պաշտոնի համար 13 թեկնածու էր պայքարում, որոնցից առավել մեծ ճանաչում ունեցող հավակնորդների թվում են Սոցիալ-լիբերալ կուսակցության թեկնածու Ժաիր Բոլսոնարուն, Աշխատավորական կուսակցության ներկայացուցիչ, Սան Պաուլոյի նախկին քաղաքապետ Ֆերնանդու Ադադը, Դեմոկրատական աշխատավորական կուսակցության թեկնածու Սիրու Գոմեսը, Սոցիալ-դեմոկրատական կուսակցության ներկայացուցիչ Ժերալդու Ալկմինը և «կանաչների» թեկնածու Մարինա Սիլվան, որն ընտրություններին մասնակցում է երրորդ անգամ:
Եթե հոկտեմբերի 7-ի քվեարկության արդյունքում թեկնածուներից ոչ մեկին չհաջողվի 50 տոկոսից ավելի ձայն հավաքել, հոկտեմբերի 28-ին կկայանա նախագահի ընտրությունների երկրորդ փուլը:










