Բուլղարիայում լրագրողի սպանությունից հետո մարդիկ մոմեր են վառել ու ծաղիկներ խոնարհել նրա հիշատակին (լուսանկարներ, տեսանյութ)
Բուլղարիայում 30-ամյա լրագրող Վիկտորյա Մարինովայի սպանության լուրից հետո, մեծ թվով մարդիկ են հավաքվել Ռուսե քաղաքի Ազատության արձանի մոտ՝ իրենց հարգանքի տուրքը մատուցելու լրագրողին, որը հետաքննել է Եվրամիության հիմնադրամների հետ կապված կոռուպցիոն դեպքերը, գրում է Daily Mail-ը: Նրանք ծաղիկներ են խոնարհել ու մոմեր վառել լրագրողի հիշատակին:
Իրենց հարգանքի տուրքն են մատուցել նաև Բուլղարիայի մայրաքաղաք Սոֆիայի բնակիչները:
Հիշեցնենք, որ 30-ամյա Վիկտորյա Մարինովայի մարմինը հայտնաբերել էին կիրակի, Ռուսե քաղաքի զբոսայգում: Հանցագործները տարել են նրա հեռախոսը, մեքենայի բանալիներն ու ակնոցները: Նա կիսամերկ է եղել և, ինչպես պարզել է քննությունը, բռնաբարված:
Բուլղարիայի վարչապետ Բոյկո Բորիսովի խոսքով՝ քննությունը շատ ապացույցներ ունի, և հանցագործին բռնելը ժամանակի հարց է:
Քննությունը դիտարկում է բոլոր վարկածները՝ նաև նրա մասնագիտական գործունեությունը: Չի բացառվում, որ նրան կարող է խելագար սպանած լինել:
Միջազգային կազմակերպությունները պահանջել են իշխանություններից անհապաղ պատժել մեղավորներին:
Մարինովան բուլղարական TVN հեռուստաալիքով վարել է «Դետեկտոր» հեռուստածրագիրը: Նա լուսաբանել է կոռուպցիայի թեման ու պատմել Եվրամիության կողմից ֆինանսավորվող նախագծերի իրականացման ժամանակ թույլ տրված չարաշահումների մասին:
Նա դարձել է 2017 թվականից ի վեր Եվրամիության երկրներում սպանված 4-րդ լրագրողը:




















