Բուլղարացի լրագրող Վիկտորյա Մարինովայի սպանության գործով կա նոր կասկածյալ, որին ձերբակալել են Գերմանիայի տարածքում. լրատվամիջոցներ

11:09 • 10.10.18

Բուլղարացի լրագրող Վիկտորյա Մարինովայի սպանության գործով կա նոր կասկածյալ, որին ձերբակալել են Գերմանիայի տարածքում, ուր նա փախել է, հայտնում է ՌԻԱ Նովոստի գործակալությունը՝ բուլղարական Nova հեռուստաալիքին հղումով, որն էլ վկայակոչում է հետաքննության ընթացքին ծանոթ աղբյուրի: 


Հեռուստաալիքի տվյալների համաձայն՝ ձերբակալված անձի ԴՆԹ-ն 100%-ով համընկնում է ԴՆԹ նմուշների հետ, որոնք հայտնաբերվել են հանցանքի վայրում իրեղեն ապացույցների վրա:


Տեղի բնակիչները լրատվամիջոցներին հայտնել են, որ իրենց հայտնի է ձերբակալվածի ինքնությունը, առկա տվյալների համաձայն՝ նա երիտասարդ է՝ ծնված 1997 թվականին: Նաև բնակիչները հայտնել են, որ բուլղարական Ռուսե քաղաքի ոստիկանությունը ժամանակավորապես ձերբակալել է նրա կնոջն ու մորաքրոջը: Այս տվյալները, սակայն, դեռ չեն հաստատվել պաշտոնապես:

 
bTV հեռուստաալիքը հայտնում է նոր ձերբակալվածի մասին, որը փախել է արտասահման: Բացի այդ, bTV-ն հայտնել է այն մասին, որ ոստիկանությունը խուզարկումներ է անցկացրել Ռուսեի բնակելի տներից մեկում և հայտնաբերել զոհի հեռախոսը, սակայն դեռ չի հաղորդվում՝ դա ում տունն է եղել և կապված է արդյոք նա նոր ձերբակալվածի հետ: 


Երեկ հաղորդվել էր, որ Բուլղարիայի ոստիկանությունը ձերբակալել է հետաքննող լրագրող Վիկտորյա Մարինովայի սպանության համար կասկածվող անձի: Նշվում էր, որ նա Ռումինիայի և Մոլդովայի քաղաքացի է: Սակայն ավելի ուշ նրան բաց են թողել՝ ապացույցների բացակայության պատճառով:


Հիշեցնենք, որ 30-ամյա Վիկտորյա Մարինովայի մարմինը հայտնաբերել էին կիրակի, Ռուսե քաղաքի զբոսայգում: Հանցագործները տարել են նրա հեռախոսը, մեքենայի բանալիներն ու ակնոցները: Նա կիսամերկ է եղել և, ինչպես պարզել է քննությունը, բռնաբարված:


Մարինովան բուլղարական TVN հեռուստաալիքով վարել է «Դետեկտոր» հեռուստածրագիրը: Նա լուսաբանել է կոռուպցիայի թեման ու պատմել Եվրամիության կողմից ֆինանսավորվող նախագծերի իրականացման ժամանակ թույլ տրված չարաշահումների մասին:


Նա դարձել է 2017 թվականից ի վեր Եվրամիության երկրներում սպանված 4-րդ լրագրողը: