Ռուսաստանցիների մեծ մասն ուկրաինացիներին խորամանկ ու երկերեսանի է համարում. հարցում
Ռուսաստանցիների զգալի մասը շարունակում է հարևան Ուկրաինային վատ վերաբերվել, իսկ ուկրաինացիներին շատերը խորամանկ ու երկերեսանի են համարում: Նման արդյունքներ են գրանցվել «Լևադա կենտրոն» հետազոտական կազմակերպության ու Կիևի սոցիոլոգիայի միջազգային ինստիտուտի համատեղ հարցման արդյունքում: Այդ մասին գրում է lenta.ru-ն:
Հարցման արդյունքները փաստել են, որ անցյալ տարվա համեմատ ուկրաինացիների համակրանքը ռուսաստանցիների նկատմամբ ավելացել է, մասնավորապես՝ քաղաքացիների 38 տոկոսը հայտնել է, որ դրական է վերաբերվում ՌԴ-ին, 10 տոկոսը՝ շատ լավ:
Ուկրաինական «Պենտա» կիրառական քաղաքական հետազոտությունների կենտրոնի ղեկավար Վլադիմիր Ֆեսենկոյի կարծիքով՝ տրամադրությունների նման փոփոխությունը կարող է կապված լինել Ուկրաինայի արևելքում ռազմական գործողությունների ինտենսիվության նվազման հետ:
Ի տարբերություն ուկրաինացիների՝ ռուսաստանցիները շարունակում են բացասական կարծիք կազմել հարևան ժողովրդի մասին: 2014 թվականից ի վեր այդ վիճակագրությունը գրեթե չի փոխվել: Հարցումները ցույց են տվել, որ քաղաքացիների շուրջ 50 տոկոսը վատ է վերաբերվում Ուկրաինային, իսկ 30 տոկոսն ուկրաինացիներին բնութագրում է որպես երկերեսանի ու խորամանկ, նախանձ՝ 22 տոկոսը, և ոչ անկեղծ՝ 23 տոկոսը: Ռուսաստանցիների 26 տոկոսը, սակայն, ուկրաինացիներին հյուրընկալ է անվանել:










