Մալայզիայում ցանկանում են վերացնել մահապատիժը
Մալայզիայում մտադիր են մոտ ապագայում չեղարկել մահապատժի մասին գործող օրենքը, հայտնում է «РИА Новости» գործակալությունը:
Ինչպես տեղեկացրել է վարչապետի գրասենյակի ղեկավար Լուի Վուի Կեոնգը, երկրի նախարարների կաբինետն արդեն հաստատել է մահապատժի չեղարկման մասին որոշումն ու ուղղել այն խորհրդարան:
Սպասվում է, որ օրենքի նախագիծը քննարկման կդրվի խորհրդարանի ստորին պալատի առաջիկա նիստի ժամանակ՝ հոկտեմբերի 15-ին:
Նա նաև նշել է, որ մինչ օրենքի լիիրավ ընդունումը Մալայզիայում պետք է ժամանակավորապես դադարեցվի մահապատիժների ավելի վաղ կայացված որոշումների ի կատար ածումը:
«Մահապատիժը պետք է չեղարկվի և վերջ: Մենք ուսումնասիրում ենք որոշակի խնդիրներ, մենք պետք է ուսումնասիրենք ու լսենք այս հարցի շուրջ բոլոր կարծիքները, սակայն այսօրվա դրությամբ կայացված որոշումն այն է, որ մահապատիժը վերացվի», - ընդգծել է Լուի Վուի Կեոնգը:
Մալայզիայում մահապատիժը նախատեսված է ծանր հանցագործությունների համար՝ սպանության, անչափահասների բռնաբարության, պետական դավաճանության, միապետության դեմ զինված ընդվզման, ինչպես նաև թմրանյութերի անօրինական առքուվաճառքի համար:
Մահապատիժը Մալայզիայում իրականացվում է կախաղանի միջոցով:










