Հեղափոխության առաջամարտիկների հետ էր, որ հակաժողովրդական քվեարկություններին կարմիր կոճակները վառում էինք՝ ի նշան հակադրության. Ուրիխանյանի «Ալյանսը» մասնակցելու է ընտրություններին

11:17 • 14.10.18

Միանշանակ է, որ «Ալյանս» կուսակցությունը մասնակցելու է ԱԺ առաջիկա արտահերթ ընտրություններին և ներկայումս վարում է բանակցություններ «հանրությանը հայտնի չափազանց մեծ թվով գործիչների հետ», որոնք բացառապես մաքուր կուսակցություն ունեն, «Հանրապետականի» իշխանության տարիներին հանդես են եկել ընդդիմադիր դաշտում և սատարել են հեղափոխությանը:

Այս մասին Tert.am-ին հայտնեց «Ալյանս» առաջադիմական ցենտրիստական կուսակցության նախագահ Տիգրան Ուրիխանյանը:

Ի՞նչ ձևաչափով, ո՞ր կուսակցությամբ կամ դաշինքով, ովքե՞ր կլինեն ցուցակում՝ այս մասին, ըստ Ուրիխանյանի, կհայտնվի բանակցությունների ավարտին:

Հարցին, թե քարոզարշավի ժամանակ երևի թե «գույներ կլինեն», դաշտեր, որտե՞ղ են լինելու իրենք, Տիգրան Ուրիխանյանը պատասխանեց.

«Լինելու ենք այն դաշտում, որում եղել ենք: Այսինքն՝ այն դաշտում, որը պայքարել է «Հանրապետականի» մենիշխանության դեմ, այն դաշտում, որն աջակցել է հեղափոխությանը և այն դաշտում, որը շարունակելու է աջակցել իշխանափոխություն իրականացրածներին՝ երկրի կառուցման գործում: Խորհրդարանում պետք է լինի առնվազն 4 խմբակցություն, և մենք գտնում ենք, որ այդ խմբակցություններից մեկը, որ կանգնել է հեղափոխության և հեղափոխականների թիկունքին, այսօր ևս՝ երկրի կառուցման ճանապարհին, պետք է լինենք մենք»,- հայտարարեց Տիգրան Ուրիխանյանը:

Ի դեպ, նա նկատեց, որ տասնյակից ավելի հանրապետական պատգամավորներ բանակցել ու շարունակում են բանակցել «Ալյանսի» հետ, բայց ինքը վստահ է, որ ՀՀԿ-ի քաղաքական կուրս իրականացրած որևէ մեկը դաշնակից համարվել չի կարող:

Հարցին, թե կան շատ քաղաքական ուժեր, որոնք այսօր իրենց համարում են ՔՊ-ի աջակից, բնական դաշնակից և այլն, իրենց և՞ս Տիգրան Ուրիխանյանը համարում է բնական դաշնակից, վերջինս պատասխանեց՝ ասելով.

«Դե, գիտե՞ք ինչ՝ ուժեր կան, որոնք ժամանակ առ ժամանակ դիրքորոշումներ են փոխում, բայց կա պարզ մի ճշմարտություն՝ գործողությունների խրոնոլոգիա. անցած գումարման խորհրդարանի 5 տարիները, առնվազն՝ վերջին 2-ը, դրսևորվել են շատ հստակ: Ըստ որում, այսօրվա հեղափոխության առաջամարտիկների հետ միասին էր, որ մենք կարմիր կոճակները վառում էինք՝ ի նշան հակադրության՝ բոլոր հակաժողովրդական քվեարկություններին»:

Տիգրան Ուրիխանյանը թվարկում է՝ այդպես են վարվել սահմանադրական փոփոխություններից սկսած, բազմաթիվ այլ նախագծերով վերջացրած:

«Անձամբ Ձեր խոնարհ ծառան՝ ես, իրավունք ունեմ ասելու, որ իմ բոլոր տարիները խորհրդարանում եղել են անշեղում պայքար մեր՝ «Քաղաքացիական պայմանագրի»  ու մեր մի քանի այլ  գործընկերների հետ, համատեղ քաղաքական ճանապարհով, ու չգիտեմ՝ տեղի է, թե ոչ «դաշնակից» բառը, բայց որ բացարձակապես նույն քաղաքական տիրույթից ենք և շարունակելու ենք այդպես լինել, դա ակնհայտ է»,-ասում է Տիգրան Ուրիխանյանը:

Հիշեցնենք, որ «Ալյանսը» դե ֆակտո և դե յուրե «Ծառուկյան» դաշինքի անդամ է, և Տիգրան Ուրիխանյանն ընդգծում  է. «Գագիկ Ծառուկյանի նկատմամբ անձնական հարգանքն ու փոխադարձ վստահությունն ու մեր գործակցությունը, ի  տարբերություն բազմաթիվ այլ մշտական կամ ժամանակավոր, կոռեկտ եմ ուզում արտահայտվել, հանգրվանողների, նախ և առաջ, ունի մի շատ կարևոր հիմք՝ պարկեշտություն և բարոյականություն: Իսկ պարկեշտությունն ու բարոյականությունն ասում են, որ մինչև ընտրությունների օրը մենք «Ծառուկյան» դաշինքի մաս լինենք, իսկ հաջորդ քայլն արդեն քննարկումների ավարտին Ձեզ սիրով կտեղեկացնենք: Բայց մի բան եմ ուզում ասել, որ դա լինելու է շատ լուրջ, չափազանց մեծ թվով և բավական Ձեր ու մեր կողմից սիրված գործիչների, խորհրդարանականների ու ոչ խորհրդարանականների մասնակցությամբ  ձևավորված ուժ: Եվ թե ես որ տեղում կլինեմ, դա բացարձակ կարևոր չէ»:

Տիգրան Ուրիխանյանը նշեց, որ իր բոլոր գործողությունները առաջին հերթին  քննարկել ու քննարկում է «Ծառուկյան» դաշինքի ղեկավարի հետ:

Հարցին, թե ինչպես վերաբերվեց գործուղման մեջ գտնվող Տիգրան Ուրիխանյանը դաշինքի պատգամավորների՝ ՀՀԿ-ականների ու դաշնակների հետ միասին ԱԺ կանոնակարգ–օրենքի քվեարկությանը, Տիգրան Ուրիխանյանը վստահություն հայտնեց, որ եթե Ծառուկյանը Հայաստանում լիներ, նման քվեարկություն, գոնե իրենց դաշինքի անդամների կազմով, տեղի չէր ունենա: