ԻՊ-ը հարյուրավոր մարդկանց է պատանդ վերցրել Դեր Զորում, այդ թվում՝ եվրոպական երկրների քաղաքացիների. լրատվամիջոցներ

15:01 • 18.10.18

«Իսլամական պետություն» ահաբեկչական խմբավորման զինյալները Սիրիայի Դեր Զոր նահանգում պատանդ են պահում շուրջ 700 մարդու, նրանց թվում են արևմտաեվրոպական ու մի շարք այլ երկրների քաղաքացիներ, գրում է «Զվեզդա»-ն՝ ռազմադիվանագիտական աղբյուրի հղումով:

Նշվում է, որ ահաբեկիչներն օրեր առաջ հարձակում են գործել Էլ Բահր բնակավայրի մոտ գտնվող փախստականների ճամբարի վրա և գերի վերցրել 130 արաբ ընտանիքի: Ենթադրվում է, որ նրանք այժմ գտվում են զինյալների ենթակայության տակ գտնվող Հաջին քաղաքում:

Պատանդների ազատ արձակման դիմաց ԻՊ-ականները պահանջում են քրդամետ «Սիրիայի դեմոկրատական ուժեր» խմբավորումից, որը մարտական գործողություններ է վարում Սիրիայի հյուսիսում որպես ԱՄՆ դաշնակից, ազատ արձակել իրենց կողմնակիցներին, որոնք գտնվում են քրդերի ձեռքում: Ահաբեկիչները հայտարարել են, որ պատանդների մահապատիժներ են իրականացնելու ամեն օր, քանի դեռ նրանց պահանջները չեն կատարվել: