Մեքսիկայի նորընտիր նախագահը խոստացել է աշխատանքային վիզաներ տրամադրել ներգաղթյալներին
Մեքսիկայի նորընտիր նախագահ Անդրես Մանուել Լոպես Օբրադորը, որը դեռ չի ստանձնել իր պաշտոնը, խոստացել է աշխատանքային վիզաներ տրամադրել երկիր ժամանած ներգաղթյալներին, գրում է «РИА Новости» գործակալությունը:
Հայտնի է, որ խոսքը, մասնավորապես, Կենտրոնական Ամերիկայից ժամանած ներգաղթյալների մասին է: Օբրադորը խոստացել է, որ գործընթացը կսկսվի իր՝ պաշտոնը ստանձնելուց անմիջապես հետո:
«Սկսած դեկտեմբերի 1-ից` մենք կսկսենք աշխատանք տրամադրել և ապահովել Կենտրոնական Ամերիկայից եկածների զբաղվածությունը: Մենք ունենք նման ծրագիր, որ նրանք, ովքեր ցանկանում են աշխատել Մեքսիկայում, ստանան աշխատանքային վիզաներ», - ասել է նորընտիր նախագահը, որն իր պաշտոնը կստանձնի այս տարվա դեկտեմբերի 1-ին:
Ներգաղթյալների բազմաթիվ հոսքեր հաճախ Մեքսիկայի տարածքով տեղաշարժվում են դեպի ԱՄՆ: Այս պահին առկա է երկու նման խոշոր խումբ, որոնք Գվատեմալայի տարածքով առաջանում են դեպի Մեքսիկա՝ ԱՄՆ հասնելու համար: Մեքսիկայի իշխանությունները հայտնել են, որ հարգում են մարդկանց ազատ տեղաշարժի իրավունքը, սակայն պահանջել են փախստականներից հարգել միգրացիոն օրենսդրության սահմանած կանոնները:










