Աշխարհն ավելի վտանգավոր վայր կդառնա, եթե ԱՄՆ-ն դուրս գա միջուկային համաձայնագրից. Կրեմլ

15:35 • 22.10.18

Կրեմլը պաշտոնապես արձագանքել է ԱՄՆ նախագահ Դոնալդ Թրամփի՝ Ռուսաստանի հետ կնքած Միջին ու փոքր հեռահարության հրթիռների ոչնչացման մասին պայմանագրից ԱՄՆ-ի դուրս գալու ձգտումը՝ նշելով, որ իրենք խորապես անհանգստացած են:

Ինչպես նշում է Russia Today-ը, ՌԴ նախագահի մամուլի խոսնակ Դմիտրի Պեսկովը հայտարարել է, որ համաձայնագրից դուրս գալու դեպքում, Վաշինգտոնն աշխարհն ավելի վտանգավոր վայր կդարձնի:

«Եթե Վաշինգտոնն իրականում հրաժարվի 1987թ. կնքված պատմական համաձայնագրից, ապա միջին ու փոքր հեռահարության հրթիռների արտադրության և կիրառման արգելքը կվերացվի: Այդ քայլի դեպքում աշխարհն ավելի վտանգավոր կդառնա»,-ասել է Պեսկովը:

Նախօրեին Թրամփը հայտարարել էր, որ Վաշինգտոնը դուրս կգա 1987թ. ԱՄՆ և ԽՍՀՄ ղեկավարներ Ռոնալդ Ռեյգանի ու Միխայիլ Գորբաչովի կնքած Միջին ու փոքր հեռահարության հրթիռների ոչնչացման մասին պայմանագրից: 

ԱՄՆ նախագահն իր որոշումը պատճառաբանել էր այն հանգամանքով, որ Ռուսաստանը խախտում է  համաձայնագրի կետերը և որ փաստաթուղթն ԱՄՆ-ի համար անընդունելի է:

Սակայն Պեսկովը հակադարձել է Թրամփին՝ նշելով, որ Պուտինը բազմիցս կտրուկ հերքել է համաձայնագրի շրջանակում Ռուսաստանի կողմից որևէ խախտում թույլ տալու մեղադրանքները:

«Հակառակը, մենք ամենատարբեր մակարդակներում փորձագիտական ապացույցներ ենք ներկայացրել առ այն, որ հենց Միացյալ Նահանգներն է խախտում համաձայնագրի դրույթները՝ տեղադրելով հակահրթիռային համակարգեր, դե ֆակտո միջին ու փոքր հեռահարության հրթիռներ հանդիսացող հարվածային անօդաչուներ»,-ասել է Կրեմլի խոսնակը:

Հայտնի է, որ պատմական համաձայնագրի շրջանակում ԱՄՆ-ն ու Ռուսաստանը պարտավորվել են ոչնչացնել գործողության միջին և փոքր շառավղով բալիստիկ ու թևավոր հրթիռներն ու այլևս չզբաղվել դրանց արտադրությամբ:

Փորձագետներն ահազանգել են, որ ԱՄՆ-ի դուրս գալու դեպքում կսկսվի 1980-ական թվականներից ի վեր միջուկային սպառազինության ոլորտում ամենալուրջ ճգնաժամը:

«Այնուհանդերձ, մենք ստիպված կլինենք արտադրել այդ զենքերը: Մենք պատրաստվում ենք չեղարկել համաձայնագիրն ու դուրս գալ դրանից»,- հայտարարել էր Թրամփը Նևադայում լրագրողների հետ հանդիպման ժամանակ:

ՌԴ Դաշնային խորհրդի միջազգային հանձնաժողովի նախագահ Կոնստանտին Կոսաչովը, մեկնաբանելով Թրամփի հայտարարությունը, նշել է, որ հետևանքներն «աղետալի» կլինեն: Այս մասին պաշտոնյան գրել է իր ֆեյսբուքյան էջում:

«Դա կհանգեցնի նրան, որ ԱՄՆ-ն կկարողանա գործողության մինչև 5.500 կմ շառավղով հրթիռներ տեղակայել Լեհաստանում ու Մերձբալթյան երկրներում՝ սպառնալիք ներկայացնելով Ռուսաստանի համար: Մարդկությանը լիակատար քաոս է սպառնում միջուկային սպառազինության ոլորտում»,- գրել է Կոսաչովը: