Չինաստանում բացվել է աշխարհի ամենաերկար ծովային կամուրջը. 4 ուշագրավ փաստ նոր կառույցի վերաբերյալ (լուսանկարներ)
Հոկտեմբերի 23-ին Չինաստանի հարավում պաշտոնապես բացվել է աշխարհում ամենաերկար ծովային կամուրջը՝ 55 կմ երկարությամբ:
Ինչպես նշում է ria.ru-ն, Հոնկոնգը, Մակաուն ու Չժուհայ քաղաքը կապող կամրջի բացման պաշտոնական արարողությանը ներկա է եղել երկրի ղեկավար Սի Ձինփինը, ինչպես նաև մոտ 700 հյուր:
Աղբյուրը նկատում է, որ նախքան կամրջի բացումը, Հոնկոնգից Չժուհայ հասնելու համար 3 ժամ էր պահանջվում, իսկ հիմա՝ ընդամենը 30 րոպե:
Մինչդեռ The Guardian պարբերականը որոշ ուշագրավ փաստեր է ներկայացրել 20 մլրդ դոլար արժողությամբ կամրջի վերաբերյալ:
Վարորդների առողջական վիճակին հետևելու են
Կամրջի առաջին առանձնահատկությունն այն է, որ այն պահից ի վեր, երբ մեքենաները սկսում են իրենց երթևեկությունը, հատուկ տեխնոլոգիաները սկսում են հետևել վարորդների սրտի աշխատանքին ու արյան ճնշմանը: Այդ տեղեկությունն այնուհետև ուղարկվում է կամրջի վերահսկման կենտրոն:

Երեք անգամից ավելի չհորանջել
Հատկանշական է, որ կամրջի վրա տեղադրված են «հորանջման տեսախցիկներ», որոնք ֆիքսելու են վարորդների ամեն մի հորանջոցը, ու եթե նրանցից որևէ մեկը 20 վայրկյանում 3 անգամից ավելի հորանջի, տագնապի ազդանշան կուղարկվի:

Հատուկ թույլտվություն
Չնայած որ կամուրջն էական նշանակություն ունի Չինաստանի ու դրա ինքնավար շրջանների՝ Հոնկոնգի, Մակաուի կապերի սերտացման հարցում, այնուհանդերձ՝ բոլորը չէ, որ դրանով անցնելու հնարավորություն կունենան: Հոնկոնգի բնակիչները կկարողանան կամրջով երթևեկել միայն հատուկ թույլտվություն ստանալու դեպքում: Դրանք տրվելու են նրանց, ովքեր պարտաճանաչ խոշոր հարկեր են վճարում Չինաստանում, զգալի նվիրատվություններ են կատարում չինական բարեգործական կազմակերպություններին, կամ էլ քաղաքական կազմակերպությունների անդամ են: Կամուրջը փակ է լինելու հանրային տրանսպորտի համար:

Քաղաքական կամուրջ
Կամրջի նպատակն է ավելի ամուր կապել Չինաստանն ինքնավար Հոնկոնգի ու Մակաուի հետ: Թեև վերջին երկուսը Չինաստանի մաս են կազմում, սակայն հատուկ վարչական շրջանների կարգավիճակ ունեն՝ առաձին կառավարություններով, դատական համակարգերով ու քաղաքականությամբ: Այժմ լուրջ մտահոգություն է առաջացել առ այն, որ այս կամրջով Պեկինը ցանկանում է է՛լ ավելի ուժեղ վերահսկողություն սահմանել տվյալ շրջանների նկատմամբ:











