Սաուդյան Արաբիան պարտավորվում է ամբողջական հետաքննություն անցկացնել Խաշուկջիի մահվան հանգամանքները բացահայտելու համար. նախարար
Սաուդյան Արաբիայի արտաքին գործերի նախարար Ադել ալ Ջուբեյրը հայտարարել է, որ իշխանությունները կանեն անհրաժեշտ ամեն բան սաուդցի լրագրող Ջամալ Խաշուկջիի հետ պատահածի կրկնությունն ապագայում բացառելու համար, փոխանցում է Al-Arabia հեռուստաալիքը:
«Կձեռնարկվեն անհրաժեշտ քայլեր՝ երաշխավորելու համար, որ այն, ինչ պատահեց, չի կրկնվի», - ասել է նախարարը:
Նա հաստատել է, որ Սաուդյան Արաբիան պարտավորվում է ամբողջական հետաքննություն անցկացնել Խաշուկջիի մահվան հանգամանքները բացահայտելու համար:
Ջուբեյրը հավելել է, որ սաուդցի լրագրողի մահվան համար պատասխանատու բոլոր անձինք կձերբակալվեն:
Հիշեցնենք, որ ընդդիմադիր լրագրողն անհետացել էր Ստամբուլում երկրի հյուպատոսություն մուտք գործելուց հետո: Թուրքական ոստիկանության վարկածի համաձայն՝ լրագրողը սպանվել է Ստամբուլում Սաուդյան Արաբիայի հյուպատոսության շենքի ներսում:
Մինչդեռ հյուպատոսարանից հայտնում էին, թե Խաշուկջին կորել է հյուպատոսության շենքից դուրս գալուց հետո:
Ավելի ուշ Սաուդյան Արաբիան հաստատել է, որ լրագրողը մահացել է, ըստ նրանց՝ դա տեղի է ունեցել հյուպատոսության ներսում ծագած վեճի հետևանքով:










