800 հազար ավստրալական դոլար. ավստրալացի զույգը պատահմամբ աղբամանն է նետել խոշոր շահում պարունակող վիճակախաղի տոմսը

15:15 • 25.10.18

Ավստրալացի զույգը պատահմամբ դեն է նետել խոշոր շահում պարունակող վիճակախաղի տոմսը: Ինչպես հայտնում է Daily Mail-ը, զույգը ստիպված է եղել այն փնտրել աղբամանում:


Ավստրալիայի Նոր Հարավային Ուելս նահանգի Կապույտ Լեռներ շրջանի բնակիչները վիճակախաղում հաղթելու մասին ծանուցումը ստացել են էլեկտրոնային փոստով: Շահումը կազմել է 800 հազար ավստրալական դոլար: Տղամարդը սկզբում զարմանքից ապշել է, այնուհետև կրկնակի ստուգել շահող թվերը:


Ուրախալի լուրով տղամարդը կիսվել է կնոջ հետ, վերջինս էլ հանկարծակի մտաբերել է, որ մի քանի օր առաջ դեն է նետել վիճակախաղի տոմսը: Խուճապահար՝ զույգը շտապել է դեպի աղբամանը. այդ օրն աղբատար մեքենան պետք է հեռացներ աղբը: Որոշ ժամանակ փնտրտուքներից հետո զույգը վերջապես հայտնաբերել է տոմսը:


«Այդ առավոտը մեզ համար լի էր իրադարձություններով, հուզմունքիս պատճառով չէի կարողանում նախաճաշել»,-պատմել է տղամարդը՝ խոստովանելով, որ շահած գումարը ծախսելու է հիփոթեքը մարելու նպատակով:


Ավելի վաղ՝ ապրիլին, հաղորդվել էր մի ամերիկուհու մասին, որը չհավատալով, որ կարող է շահել՝ դեն էր նետել 2 միլիոն դոլար շահումով վիճակախաղի տոմսը: Տոմսը գտել էր ամուսինը: