Համաներման՝ «Սասնա Ծռերին» վերաբերող դրույթը կարող է կիրառման ճգնաժամ առաջացնել, անհրաժեշտություն կլինի դիմելու ՍԴ. փաստաբան (տեսանյութ)
Համաներման նախագծում «Սասնա Ծռերին» վերաբերող այն դրույթը, որ եթե պատանդառուն կամ տուժողն առարկեն ՊՊԾ գունդը գրաված անձանց նկատմամբ համաներում հայտարարելուն, ապա համաներման կիրառումը կարող է տարընթերցման տեղիք տալ: Ես կարծում եմ՝ և´ իրավական, և´ քերականական առումով այն խմբագրման կարիք ունի: Այս մասին Tert.am-ի հետ զրույցում ասաց «Սասնա Ծռեր» կուսակցության անդամ, փաստաբան Արայիկ Պապիկյանը: Ըստ նրա` համաներում կիրառելու ընթացքում կարող է առաջանալ ՍԴ դիմելու անհրաժեշտություն:
«Եթե կիրառման ընթացքում դատարանը, դատախազը, քննիչը այստեղ խնդիր կտեսնեն և կիրառման ժամանակ կամայական մոտեցում կցուցաբերեն, ապա մենք օրենքի կիրառման առումով կունենանք ճգնաժամային վիճակ: Պատկերացրեք՝ անձը` դիցուկ տուժողներից մեկը, հայտարարում է, որ դեմ է այդ քրգործերում մեղադրվող անձանց նկատմամբ օրենքի կիրառմանը, և եթե դատարանն այս կամայական մոտեցմանն ընթացք պիտի տա, որոշումն ըստ ընթացակարգի կվիճարկենք, ընդհուպ մինչև Սահմանադրական դատարան»,-մանրամասնեց Արայիկ Պապիկյանը:
Անդրադառնալով հարցին՝ արդյոք «Սասնա Ծռերի» բոլոր անդամնե՞րն են համարում, որ իրենց նկատմամբ պետք է համաներում կիրառվեր, օրինակ՝ Պավել Մանուկյանը հայտարարել էր, որ իրենք հանցագործություն չեն կատարել, այլ ապստամբել են և համաներման կարիք չունեն, Արայիկ Պապիկյանն ասաց.
«Գործի քննության առաջին օրվանից՝ և´ նախաքննության, և´ դատաքննության ընթացքում, ես՝ որպես փաստաբան, հայտարարել եմ, որ ապստամբելու իրավունքը բնական իրավունք է: «Սասնա Ծռերն» այդ իմաստով անպարտ է, ապստամբության իրավունքի իրացման դեպքում մեղադրական երգակցությունը բացառված է: Բայց, հաշվի առնելով այն իրողությունը, որ մեր ունեցած Սահմանադրությունը, դատական, դատախազական համակարգը, քննչական համակարգը՝ իրենց ամբողջական կառուցվածքով, մոտեցումներով, իրավակարգավորումներով նույն համակարգն է, ինչ մենք ունեինք 2016 -2017 թթ., որն այսօր էլ շարունակում է հերքել ապստամբության իրավունքի գոյությունը, այդ համակարգից ակնկալել արդարացման դատական ակտ, միամտություն է, պարզապես անհնար է»,-նկատեց նա:
Անդրադառնալով հարցին, թե ինչպիսի կարգավորում է լինելու Արայիկ Խանդոյանի պարագայում, Արայիկ Պապիկյանն ասաց, որ օրենքը թույլ է տալիս մահացած անձի նկատմամբ քրեական հետապնդումը դադարեցնելու և կարճելու, սակայն նրա իրավահաջորդները դեռևս պետք է իրենց դիրքորոշումը հայտնեն:
«Նրանք դեռևս դատարանում չեն հայտարարել իրենց դիրքորոշումը, եթե ընդհանուր մոտեցում կլինի, որ պետք է օգտվեն համաներումից, ապա, հավանաբար, այդպես կլինի, բայց չեմ բացառում, որ ցանկություն կունենան պայքարելու Խանդոյանի նկատմամբ արդարացման դատական ակտի կիրառման համար»,-ընդգծեց նա:
Մանրամասները`տեսանյութում










