ՀՀԿ–ական պատգամավորները ենթարկվում են աննախադեպ ճնշումների, դա է պատճառը, որ շատերը ստորագրում են տարբեր փաստաթղթերի տակ. Դավիթ Հարությունյան (տեսանյութ)

14:44 • 27.10.18

Չեմ կարծում, որ հոկտեմբերի 29-ին ԱԺ «Հանրապետական» խմբակցությունը կողմ կքվեարկի Ընտրական օրենսգրքի բարեփոխումների նախագծին: Այս մասին այսօր Եռաբլուրում լրագրողների հետ զրույցում ասաց արդարադատության նախկին նախարար Դավիթ Հարությունյանը: 

«Չի կարելի հընթացս փոխել խաղի կանոնները, հատկապես, եթե հաշվի առնենք, որ դեկտեմբերին ամենայն հավանականությամբ տեղի են ունենալու արտահերթ խորհրդարանական ընտրություններ: Դա պայմանավորված է այն հանգամանքով, որ յուրաքանչյուր քաղաքական ուժ պետք է դրան նախապատրաստվի»,- նշեց նա: 

ԸՕ փոփոխությունների վերաբերյալ Դավիթ Հարությունյանի անձնական մոտեցումը հետևյալն է՝ բաց համամասնական ցուցակներն անհամեմատ ավելի ժողովրդավարական են և ավելի մեծ հեռանկար են բացում Հայաստանի զարգացման համար, քան փակ ցուցակներով ընտրությունների կազմակերպումը: 

Ազգային ժողովում ԸՕ բարեփոխումների նախագիծը տապալվելուց հետո վարչապետ Նիկոլ Փաշինյանը՝ դիմելով ՀՀԿ-ական պատգամավորներին, ասել էր. «Մեկը չկա՞, որ ձեզ ձեր շահը բացատրի»: Վարչապետի հայտարարության հետ կապված Դ. Հարությունյանը նշեց. «Ես հասկանում եմ բոլորին անպայման սովորեցնելու գայթակղություն, փորձելու փաթաթել սեփական կարծիքը, սակայն այդ սցենարները հայտնի են քաղաքականության մեջ, հաճախ են օգտագործվում: Վարչապետի ասածը, թերևս, պետք է հնչեր որպես սպառնալիք: Բանն այն է, որ այսօր էլ «Հանրապետական խմբակցության պատգամավորներ ենթարկվում են աննախադեպ ճնշումների, դա է պատճառը, որ շատերը ստորագրում են տարբեր փաստաթղթերի տակ կամ կողմ են քվեարկում մի նախագծի»:

Արդարադատության նախկին նախարարը նաև հայտնեց, որ Հանրապետական կուսակցությունը առաջիկա խորհրդարանական ընտրություններին մասնակցելու ֆորմալ որոշում չունի, բայց ամենայն հավանականությամբ ՀՀԿ-ն կմասնակցի ընտրություններին: 

19 տարի առաջ հոկտեմբերի 27-ին Ազգային ժողովում տեղի ունեցած ոճրագործությունը, Դ. Հարությունյանի կարծիքով՝ առնվազն քսան տարի հետ գցեց ՀՀ-ին:

Հարցին, թե երբևէ ամբողջությամբ կբացահայտվի «Հոկտեմբերի 27»-ի գործը, նա պատասխանեց. «Որպես մարդ, որը եղել է դահլիճում և ահաբեկիչներին որպես կենդանի վահան ուղեկցել է մինչև մեկուսարան, ես իմ կարծիքն արտահայտել եմ: Իմ տպավորությունն այն է եղել, որ նրանք գործել են ինքնուրույն: Այնպես որ, հարցադրումն ինձ համար հասկանալի չէ»:

Ըստ նրա՝ «Հոկտեմբերի 27»-ի պատվիրատուների մասին խոսակցությունները քաղաքական ենթատեքստ ունեն, ոչ ավելի: